Hyderabad: Cyberabad commisionaerate ki jeddimetla police ne TSPSDCL mein kaam karne walay 1 shakhs ko Jedimetla police station aur jedi metla traffic police station kardiya se bijli ka rabta munqata kardiya.
Police ne kaha ke A.Ramesh ne traffic signal ke bhi fuse nikal diye thay jiski wajah se woh do ghantay se ziyada waqt tak traffic signals band hogae thay. yeh waqea is waqt paish aaya jab traffic police ne ramesh ki motorcycle par sawaar ek na baligh ko pakadliya aur is ki gaadi zabt karli thi.
Police ne iske khilaaf IPC ki mutadid daf-aat ke tehat muqadma darj kya aur usay jumaraat ke roz juditional remand per bhej diya. do roz qabal traffic police qawaid ki khilaaf wazion ke silsilay mein gadiyon ki checking kar rahay thay. Unhon ne motorcycle par ek ladke ko dekha aur usay rok kar dastawizaat ki jaanch ki. muaina ke douran ladka jo na baligh tha is ke paas driving license aur deegar zaroori dastawizaat nahi theen.
Is ne fori tor par motocycle ke maalik ramesh ko ittila di. ramesh mauqa par pohancha aur duty par mojood traffic ohdedaron se behas ki. jab police ne iski gaadi nahi choadi aur chalaan kiya to is ne inhen dhamki di aur wahein se chala gaya.
Baad mein is ne dono police stationon aur traffic junction ko bijli ki farahmi munqita kar di. police ne mehakma bijli ke aala ohdedaron ko chokas kardiya jis ke ek ghantay se ziyada waqt ke baad bijli ki farahmi bahaal kar di gayi. is muqadma ke baad police ne TSPSDCL ko bhi aagah kiya jis ne ramesh ko show case notice jari kya aur is ke khilaaf tadeebi karwai ka aaghaz kya.