Dubai: Fly Dubai ney 7 July se 24 shehroun ke liye parwazein bahaal karne ka elaan kiya hai. Tafseelaat ke mutabiq Fly Dubai mein Commercial operations ke executive chairman Ahmed Abdullah ney Fly Dubai.com par bayan mein kaha ke 24 June se parwaazoun ke liye booking shuru ki gayi hai. Parwaazoun ka silsila 7 July se shuru hoga.
Bayan ke mutabeq 24 shehroun ke liye parwazein chaleyi jaengi taham nai parwaazoun ka izafah bhi jari rahay ga. Ahamd Abdullah ne tawaqqa zahir ki ke mausam garma ke douran 66 shehroun ke liye Fly Dubai ki parwazein muhayya hon gi taham is ka dar-o-madar bain ul aqwami parwaazoun ki bahali par hai. Bayan mein ye bhi kaha gaya ke Fly Dubai ne mehfooz tareeqay se fazai safar ki bahaali ki tayariyaan ki hain. Koshish hogi ke Fly Dubai se safar karne walay coronavirus ki waba ke khatraat se intahaa darjay mehfooz rahen.
Is se qabal Fly Dubai ne elaan kiya tha ke, Amman, Baku, Beirut, Belgrade, Isfahan, Juba, Khartoum aur Tehran waghera ke liye parwazein shuru ki jayen gi. Fly Dubai ne mausam garma ke douran mazeed shehroun ke liye parwazein chalanay ka ishara bi diya hai.