Jaipur : Rajasthan ke dar-ul-hukoomat ke mukhtalif ilaaqoun mein guzishta do roz se jari firqa waranah jhadapoun ke baad mamnua ehkamaat nafiz kiye gaye hain. is waqiye mein 10 afraad zakhmi hue hain. police ne bataya ke hujum ko roknay ke liye ansoo gas ke goloun ka istemaal kiya gaya aur paanch afraad ko girftar kar liya gaya.
Mangal ki raat der gaye 15 thaana ke daira-e-ikhtiyar mein aane walay ilaaqon mein 5 se ziyada afraad ke jama honay se roknay wali, CRPC , ki dafaa 144 nafiz kar di gayi hain. sath hi kisi bhi na-khushgawaar waqeye se bachney ke liye shehar mein police ki bhaari jamiat ko tainaat kiya gaya hai.
Police commissionaire Anand Shrivasatav ne bataya ke un ilaaqoun mein Galita gate, Ram ganj, subhash chowk, brhma-poori, kotwali, sanjay circle, Neher gadh, Shastri nagar, bhutta basti meem, Adarsh Nagar, Moti dongri, laal kothi, transport nagar aur Jawahar Nagar shaamil hain.
Peer ko der gaye firqa-waranah bad-amni ke baad internet khidmaat pehlay hi mo-attal kar di gayeen hain. Ek ohdedar ne bataya ke pabandi ke mazeed ehkamaat chaharshambe ke roz bhi jari rehne ki umeed thi. Mangal ke roz 11 bajey ke qareeb taaza jhadapen shuru ho gayeen. pathrao ki it-tila-aat hain jis ke nateejay mein 30 gadiyon ko nuqsaan pohancha aur 10 afraad zakhmi hue .
Mangal ke roz Galta ke gate ke ek mazhabi muqam par pathrao kiya gaya. din ke waqt aman ijlaas munaqqid kiye gaye, jo nakaam rahen, aur der raat phir se halaat kasheeda ho gaye. –YTN STAFF