Hyderabad: Engineering colleges ke mutaliq aaye din kuch na kuch manfi khabar padhnay mein aati hai lekin is martaba jo haqeeqat samnay aayi hai is ne engineering shobay mein mulazmat aur tabnaak mustaqbil ke khawab dekhnay walon ko neend se jaga diya hai. Kyun kay ab kayi engineering colleges mein intizamia ki janib se asatezah ko aindah taleemi saal mein dakhlon ke liye ziyada se ziyada talba ko mutwajjah karne ke liye inhen marketing agent bana diya gaya hai .
Engineering colleges mein aala taleem faraham karne walay asatezah jo kay 10 taa 15 saal ka tajurbah rakhnay ke alawa M.tech aur P.hd ki degree bhi rakhtay hain un tamam qabliton ke bawajood inhen ghar ghar apne college ki marketing karte dekha ja raha hai kyunkay intizamia ki janib se inhen nah sirf rozana ka hadaf diya gaya hai balkay wazeh tor par inhen yeh intibah bhi day diya gaya hai ke agar woh rozana ka hadaf poora nahi kar paate hain to nah sirf inhen tankhwa mein katoti ka saamna karna pade ga balkay halaat sangeen hue to inhen mulazmat se bhi haath dhona padh sakta hai, yahi wajah hai ke kayi engineering colleges ke asatezah EAMCET marakaz par apne colleges ke Pamphlet taqseem karne ke alawa talba ki tafseelaat bhi haasil karte dekhe ja rahay hain jabkay chand colleges ke asatezah dehaton ka safar bhi kar rahay hain taakay college mein ziyada se ziyada talba ka dakhla karwate hue apni mulazmat ko bhi bachaaya jasakay .
Is ziman mein izhaar-e-khayaal karte hue Telangana technical Institution Employees association ke sadar Bal krishna Reddy ne kaha ke JNTU ke taleemi saal ke douran mausam-e-garma ke 6 haftay engineering colleges ko tatilat hoti hain jo ke 28 April taa 9 June ke darmiyan hoti hain aur is douran college ke asatezah ko intizamia ki janib se dakhla ke agent bana diya ja raha hai aur woh rozana ke ahdaaf ko mukammal karne ke liye ghar ghar apne college ki tashheer karne ja rahay hain aur baaz asatezah to dihaton ka dora karte hue wahan talba aur walidain ko is baat par amaada kar rahay hain ke woh unke college mein dakhla len . –YTN STAFF