Washington : America mein ek khatoon ko kam az kam 369 Instagram accounts banakar fitness baradri ke apne mutadid sathiyon aur hareefoun ko harasan karne aur dhamkane par qaid ki saza sunadi gayi.
Washington post ke mutabiq fitness trainer aur 4 bachon ki maa 37 sala Tommy Stephen ne 369 instagram accounts aur 18 mukhtalif E-mail pattoun ko online harasan karne aur dhamkiyan denay ke liye istemaal kiya hai.
Yeh khatoon ek Gym ke apne sabiq tijarti shiraakat daaroun aur body building ki duniya mein apne hareef afraad ko harasan kar rahi thi. khatoon ke ek instagram account mein ek paegham bheja gaya mein tum ko chootey tukdoun mein kaatnay ki mansoobah bandi kar rahi hon, tumhara khoon ka zayeqa bhi chakhna pasand karoongi. ab is khatoon ko cyber aur online dhamkiyan bhejnay par Amrici wifaqi adalat ne 5 saal qaid ki saza sunai hai aur FBI agent ke mutabiq is khatoon ke jaraim ki tafseelaat haeran kardainay wali hain.
Dar haqeeqat online harasan karna to is ajeeb muqadma ka ek pehlu hai. hukkaam ke mutabiq is khatoon ne apne sabiq shiraakat daaron se intiqam lene ke liye ek sir kati gudia aur apni beti ke farzi aghwa ki koshish bhi ki aur wajah bas yeh thi ke is ka maanna tha ke shiraakat daar ne is ke online fitness muqablay mein kamyabi ke imkanaat khatam kardiye they jo ke ghalat tha.
Iska aaghaz 9 July 2018 ko is waqt hua jab stephen ne police se rabita karkay kaha ke iske ghar ke bahar ek parcel mila tha jis mein ek sar kati gudia thi jis par likha tha tumahray bachon ke liye naya khilona. 5 din baad khatoon ne phir police se rabita kiya aur bataya ke kisi ne is ki 12 sala beti ko aghwa karne ki koshish ki aur ehalkaron ko aghwa ki koshish ki jagah par li gayi jahan ek laptop cover jhadion mein chhupa hua mila, jis mein mojood ek kaghaz mein khatoon aur iske ghar ke baray mein tafseelaat mojood thi.
Magar police ko is waqt shak hua jab bachi ne un se poocha ke is waqt is ki maa ke sath kiya hoga jab woh sach boldegi. jis ke baad ek CCTV footage se maloom hua ke khatoon ne Laptop cover ko khareeda tha aur yeh bhi daryaft kiya gaya ke is ne bachi ko aisa karne par majboor kiya kyunkay sir kati gudia par police ka rad-e-amal tawaquaat ke bar-aks tha. 17 July ko farzi police report darj karwane, shawahid se chedh-chadh aur bachoun se ghaflat ke ilzamaat par usay girftar karliya gaya aur police ne is mazeed izafah is waqt kiya jab khatoon ne jail se phone mein apni beti ko kaha ke woh aghwa ki koshish ki zimmedaari qubool karle. khatoon ne beti ko kaha tum mushkil ka shikaar nahi hogi lekin mein zaroor hojaongi. –YTN STAFF