Dubai: Dubai mehakma taleem ney kaha hai ke China aindah taleemi saal ke aghaz Dubai mein apna pehla sarkari School khole ga. Ye China ke baher pehla sarkari school hoga. Is mein 2 hazaar talba ki gunjaish hogi. School ka iftitah September mein hoga. ‘Emarat Al Youm ke mutabiq Cheeni School ki imarat Mirdif ke ilaqay mein taamer ki gayi hai. Yahan Cheeni nisaab padhaya jaye ga. School ke qiyam ka bunyadi maqsad Emarat mein Cheeni community ko taleemi sahoolat faraham karna hai.
Nisaab mein China ki sarkari zabaan, Science, Reyazi, Technology Engineering, Ikhlaqiaat, Sports aur fanoon lateefa waghera shaamil hon ge. Alawa azeen China ke sarkari school mein doosri zabaan Arabi hogi jabkay Islamiyat aur samaji mutalaat ka mazmoon bhi shaamil hoga.