Abu Dhabi: Abu Dhabi mehakma baldiyat ow Transport ne kaha hai ke shehar mein Public Transport haftay ke roz se bahaal ki jaye gi. Emarati News Agency ke mutabiq mehakmay ne kaha hai ke guzashta 48 ghantay se Public Transport mein istemaal ki jaany wali tamam Buses ki safai huvi aur jaraseem kash adwiyah ka istemaal huwa.
Mehakmay ne kaha hai ke Public Transport ki bahaali ke sath musafiroun ki salamti ke liye sakht hifazati intizamaa par amal jari rahega. Shehar bhar mein jaraseem kash adwiyah ka istemaal jari rahay ga jabkay tamam Buses, Taxes aur Public Transport ke zaraye ki rozana ki bunyaad par Sanitizing hogi. Mehakmay ne kaha hai ke tamam musafir douran safar ek dosray se zurori faasla rakhnay ke paband honge aur Mask aur dastanoun ke alawa Sanitizer istemaal karenge.
Doosri taraf Dubai hukoomat ne Metro aur Bus Service juzwi tor par bahaal karne ka faisla kiya hai. Dubai hukoomat ne kaha hai ke shehar mein Public Transport din mein sirf 12 ghantay ke liye kaam keregi. Hukoomat ne kaha hai ke juzwi bahaali ke sath hifazati intizamaa par amal jari rahay ga, Samaji faasla barqarar rakhnay ke alawa musafiroun ko Mask pehna honge. Dubai hukoomat ne kaha hai ke Metro Dubai subah 7 bajey se shaam 7 bajey tak chalegi. Ye tajurbah ek hafta tak jari rahega, Is ke baad is faislay ka jaiza liya jayega. –YTN STAFF