Kozhikode: khawateen ke mutaliq yeh baat mashhoor hai ke woh khandan ke liye bohat se qurbaniyan deti hain aur waqt padney par woh khandan ke liye jaan bhi deti hain lekin ek waqea aisa bhi runuma hua jahan ek khatoon ne ek nahi do nahi 17 barsoun mein apne kayi afraad-e-khandan ko mout ki neend suladi.
Ek khatoon ne intahi sifakana andaaz se 17 barson ke douran apne khandan ke kayi afraad ko khanay aur mashrobat mein zeher dekar qatal karne ka aiteraaf kiya hai.
Report ke mutabiq Jolly Nami khatoon jo pehlay jolly thomas ke naam se jani jati thi, isne khandan ki doulat aur is par control ke maqsad ke liye yeh kaam kiya. Hindustan ki junoobi riyasat Kerala ke zila (kozhikode) se taluq rakhnay wali is khatoon ke baarey mein yeh inkishaaf police ki janib se ek press conference mein kiya gaya. Jolly ke hathon qatal honay walay afraad ka taaluq is ke sasural se hai jin mein shohar aur ek 2 sala bacha bhi shaamil hain.
Muqami police ke sarbarah KG Simon ne kaha hum ne Jolly thomas, iske dost M mathew ( jis ne potassium ke zehar ka intizam kiya ) aur ek jewelry mulazim ko giraftar kiya hai jis ne zeher faraham kiya. yeh giraftariyan is muqadma ki ek saal tak jari rehne wali tehqiqaat ka nateeja hain. police ke mutabiq khatoon ne 2002 mein is silsilay ka aaghaz apni saas Anama thomas ke qatal se kiya, jin ko saalan mein zeher mila kar mara gaya.
2008 mein isi tarhan Jolly ne apne sasur ko bhi qatal kiya jo saalan aur chawal khanay ke baad margaya. police ke mutabiq un dono halakaton par kisi ko shak nahi hua aur phir iske baad Jolly ke shohar Roy thomas ki baari aayi jo chawal aur saalan khanay ke baad chal basa. iski laash ek bath room mein daryaft ki gayi jo ke band tha aur darwaaza todna pada tha lekin muqami police ne is waqt usay khudkushi qarar day diya.
Is waqt roy ke uncle 68 sala mathew ne post mortem ke liye zor dala, jis mein zahreeley mawaad ko jismani nizaam mein daryaft kiya gaya, lekin usay khudkushi ka zareya samjha gaya. taham phir 2014 mein mathew ko bhi Jolly ne coffee mein zeher mila kar qatal kardiya jis ke baad is khatoon ne apne sabiq shohar ke cousin se shadi karli lekin is se pehlay iski biwi Sally aur 2 sala bachay alphaine ko bhi qatal kardiya.
Un halakaton par Uske shohar ko kuch arsay ke liye hirasat mein bhi liya gaya lekin shawahid na honay par raha kardiya gaya. Jolly ki giraftari ab is ke sabiq shohar ke bhai Raju thomas ki janib se tehqiqaat ke mutalbe par hui aur usay guzishta haftay girftar kiya gaya.
Police ke mutabiq unhon ne tamam qabron se namoonay haasil kiye jis mein Sinaide ki mojoodgi saabit hui, jiske baad Jolly ne aiteraaf karliya. muqami media ka daawa hai ke yeh khatoon khandan ki doulat par qabza karna chahti thi aur muqami hukkaam ki janib se jaali wasiyat namay bananay ke muamlay ki bhi tehqiqaat ki jarahi hai. –YTN STAFF