New Delhi: Cricket Legend Sunil Gavaskar ke baad Hindustani team ko pehla World Cup khitaab dilwanay walay sabiq Captain Kapil Dev ne bhi Chennai Super Kings ke captain Mahendra Singh Dhoni ko Domestic Cricket khailnay ka mashwara diya hai. Unhoun ne kaha hai ke agar Dhoni is saal ki terhan match practice ke baghair Indian Premier League ( IPL ) mein khailnay ka faisla karte hain to un ke liye behtar muzahira karna namumkin hoga. Pichlle saal June mein World Cup khailnay walay Dhoni taqreeban 1 saal ke baad maidan mein utre thay aur 39 sala Dhoni ki zair-e-qayadat Chennai Super Kings pehli martaba IPL ke Playoff mein jagah bananay mein nakaam rahi hai.
England mein munaqidah World Cup 2019 ke Semifinal ke baad pehli martaba musabiqati Cricket khailnay walay Dhoni 14 matchon mein sirf 116 ke Strike Rate se 200 runs hi bana sakay jabkay unhoun ne koi nisf century score nahi ki. Kapil Dev haal hi mein dil ka dora padney ke baad Angioplasty ka saamna karna pada tha, Woh chahtay hain ke Dhoni ko Domestic Tournament mein ziyada se ziyada khelna chahiye.
Kapil ne kaha ke agar Dhoni har saal sirf IPL mein khailnay ka faisla karte hain to phir un ke liye umdah karkardagi ka muzahira namumkin hoga. Kapil ne kaha ke omar ke baray mein baat karna theek nahi hai lekin woh apni 39 saal ki omar mein jitna ziyada khelain ge, Jism itna hi fit rahay ga.
Sabiq Captain Kapil Dev ne kaha ke agar aap ek saal mein 10 mah tak cricket nahi khelain ge aur achanak aap IPL khelo ge to aap dekh satke hain ke kiya hoga. Itni cricket khailtay waqt aap ko ek season mein atar chadhao ka saamna karna pad sakta hai. Chris Gayle jaisay khiladi ke sath bhi aisa hi huwa hai. Kapil ka khayaal hai ke Dhoni ko is Season mein Domestic Cricket khilni chahiye. unhoun ne mazeed kaha ke usay First Class Cricket ( Domestic List A aur T20 ) mein shirkat karna chahiye aur behtar khelna chahiye.