New Delhi: Hindustan ki Dar-ul-hukoomat Dehli ke ferozshah kotlah ground par khailay jaanay walay muqaabla mein Dehli Capitals aur maheman chennai super kings aamnay samnay honge lekin is muqaabla mein dono hi teamon ke Captains Rishabh Pant aur MS Dhoni ki qayadat aur batting par dunyae cricket ki tavajjo markooz hongi kyun kay worldcup ke tanazur mein MS Dhonike sath dusray wicket keeper ki shamoliat ke liye Pant ko sab se mazboot dawaydaar maana ja raha hai .
Pant naay Mumbai ke khilaaf khelay gaye guzashta muqaabla mein hareef team ke khilaaf tez tareen nisf century ka record bhi Dhoni se cheen liya hai jaisa ke Dhoni naay Mumbai Indians ke khilaaf jahan 20 geindon mein nisf century score ki thi wahein guzashta muqaabla mein Pant naay sirf 18 gaindon mein nisf century score karte hue team ki kamyabi mein kalidi Batting ka muzahira kiya hai .
Chennai Super Kings mein jahan apne pehlay muqablay mein Virat kohli ki zair-e-qiyadat Royal Challengers Banglore ko shikast di to wahein doosri janib Dehli naay rawan season shandaar aaghaz karte hue teen martaba ki champion Mumbai Indians ko pehlay hi muqablay mein nakami ka maza chakha diya hai. Dehli ke maidan ki wicket Chennai Super Kings ke liye sazgaar hosakti hai kyun kay MS Dhoni ki team naay Harbhajan Singh, Ravinder Jadeja aur Imran Taher moujood hain jinhon naay guzashta muqaabla mein banglore ke liye halaat mushkil tareen kar chukay they .
Pant ke liye bhi Dhoni ke khilaaf pareshan kin sorat e haal hosakti hai kyunkay ek janib Pant ka record spinners ke khilaaf shandaar nahi hain to doosri janib Dhoni ki hikmat e amli bhi Pant ko nakaam banaskti hai. Harbhajan Singh jinhoun naay banglore ke khilaaf Man of the match muzahira kiya hai aur un ka bowling record baen haath ke batsmanon aur khaas kar ke jarehana batting ke liye jo mashhoor hain un ke khilaaf behtar hai. pehlay muqablay mein Virat kohli aur AB de villers ko out karne ke baad harbhajan ke hauslay aasman se baaten kar rahay hain lehaza Pant ke khilaaf harbhajan ke muzahiray ahmiyat ke haamil honge .
Chennai ke batsman jahan teizi ke sath runs bananay ke liye koshan honge to doosri janib Ishant sharma aur Trent Boult Dhoni ki team ko behtar shuruvaat haasil karne se roknay ke liye koshan honge.