New Delhi: Hindustani cricket team ke sabiq captain Sorav Ganguly ne kaha hai ke hindustani cricket team ke selectors aur captain Virat kohli ko ab MS dhoni ke mustaqbil par faisla karna chahiye.
Haal hi mein social Website par kohli ke ek post ki wajah se Dhoni ki subukdoshi ke paish-e-nazar phir behas honay lagi thi halaanke sabiq captain Dhoni ne ab tak apni subuk doshi par koi wazahat nahi ki hai.
Umeed thi ke dhoni is saal England mein hue ICC world cup ke baad cricket se kinara kash hojaienge lekin unhon ne aisa nahi kiya jis ke baad kayi sabiq cricketaron ka yeh bhi khayaal hai ke dhoni ko ab apne mustaqbil par koi faisla lena chahiye.
Sabiq captain ganguly ne kaha mujhe nahi maloom ke selectors kiya soch rahay hain aur captain kohli ka kiya sochna hai lekin yeh sabhi ahem log hain aur inhen dhoni ke mustaqbil ke baray mein kuch sochna chahiye. 38 sala dhoni fil haal hindustani team ke sath nahi hain.
Dhoni ne world cup ke baad west indies ke pehlay doray se khud ko door karliya tha aur fouj ki ek mah ki training par chalay gaye they lekin mojooda gharelo africi series ke liye bhi mehdood over ki team mein dhoni ko jagah nahi mili hai. ganguly ne isi ke sath hi junoobi Africa ke khilaaf team ko fatah ka haqdaar batatay hue kaha Hindustan apne maidan par hamesha challenging team rahi hai inhen unke maidan par shikast dena asan nahi hai.
Hindustan aur junoobi Africa ka pehla T20 match barish ki Nazar hogaya tha aur ab series ka dosra match chaharshambe ko mohali mein hoga. –YTN STAFF