Riyadh: Saudi Arabia mein ZamZam mein maang aur istemaal mein izafay ki wajah se naqli ZamZam bhi farokht mein izafah hojata hai aur kuch log sadkon ke kinare milawati aur naqli ZamZam farokht karte hain aur awam aasani aur sahoolat ki khatir ZamZam khareedney ke liye plant jaanay ke bajaye sadak par bechnay walon se khareed lete hain. sadak par farokht honay wala ZamZam milawat shuda hota hai. jaal saaz ZamZam ke sath aam pani ki milawat karte hain. ghiza aur dawa board ney Twitter par apne Account mein kaha hai ke unki tafteeshi teamon ney guzashta dinon mashriqi ilaqay mein naqli ZamZam farokht karne walon ko girftar kya hai. yeh dhoka baz milawati ZamZam farokht kar rahay they. unke qabzay se badi miqdaar mein milawati ZamZam ke Can baramad kiye gaye. isi tarhan Riyadh , Damam aur deegar shehron mein bhi milawati ZamZam farokht karne ka karobar urooj par hai. Mecca aur Madinah se door ilaqon mein yeh kaarobar khaas tor par chamak raha hai. iski wajah yeh hai ke Mecca aur Madina se door daraaz ilaqon mein jahan aasani ke sath khalis ZamZam dastyab nahi hota wahan milawati ZamZam ki farokht ke imkanaat ziyada hotay hain. ZamZam plant intizamia ney Mecca, Jeddah aur Madina mein ZamZam ki sarbarahi karne ke idaray qaim kar rakhe hain. yahan afraad khanah ki tadaad ke hisaab se inhen ZamZam faraham kiya jata hai. Ek afraad khandan mein fee shakhs 2 can liye ja sakte hain. pandrah din baad phir dobarah ZamZam haasil kya ja sakta hai .
Mecca, Madina aur Jeddah ke rahaishion ke liye ZamZam ka husool aasaan hai. yahi wajah hai ke un ilaqon mein milawati ZamZam ke kaarobar ka rivaaj nahi hai. ZamZam intizamia is baat par zor deti hai ke plant se haasil kiye jaanay walay can zaati istemaal ke liye hon. inhen farokht karna mana hai. asli ZamZam ek khaas shakal wo soorat ke Can mein sarbarah hota hai jabkay milawati ZamZam saada can mein dastiyab hota hai. mahe Siyam mein aam musalman ki koshish hoti hai ke iski iftaar khajoor aur ZamZam se ho. isi wajah se har ghar mein ZamZam ke can ki zaroorat hoti hai. intizamia ZamZam ki izafi talabb ko poora karne ke liye ZamZam mein khusoosi iqdamaat karti hai. is ke liye paedawar mein izafah aur duty auqaat mein bhi tabdeeli ki jati hai . –YTN STAFF