New Delhi: Delhi ke shumal mashriqi ilaaqoun mein phailay tashadud ke hawala se bain ul aqwami mazhabi azaadi se mutaliq Americi Commission (USCIRF) ki janib se zahir ki gayi tashweesh ko wizarat khareja ne mustard karte huve kaha ke Commission ka tabsarah haqayiq ke aitebaar se ghalat aur gumraah kun hain.
Wizarat khareja ke tarjuman Ravish Kumar ne Delhi ke shumal mashriqi ilaaqoun mein phailay tashadud ke silsila mein kiye ja rahay tabsaroun ke baare mein Media ke sawalaat ka jawab dete huve kaha mein ne USCIRF, Media ke kuch hissoun aur kuch dosray logoun ki taraf se kiye gaye tabseroun ko dekha hai. Ye tabsaray haqayiq par mabni nahi hain aur mukammal tor ghalat aur gumra karne wali hain aur masail ko siyasat zada karne ke maqsad se kiye gaye hain.
USCIRF ki Commissioner Anurima Bhargava ne Delhi mein tashadud ke seyaq o Sabaq mein tabsarah karte huve kaha poori Delhi mein sifakana aur be qaboo tashadud jari nahi reh sakti hai. Hukoomat Hind ko apne tamam shehrioun ki hifazat ko yakeeni bananay ke liye fori tor karwai karni chahiye.
Is par rad e amal zahir karte huve tarjuman ne kaha ke is terhan ke tabsaray se lagta hai ke is masla ko siyasat se aaloda kiya ja raha hai. Unhoun ne kaha hamari Law and Order banaye rakhnay wali Agency mutasirah ilaaqoun mein tashadud ko roknay aur aetemaad aur halaat ko bahaal karne ke liye kaam kar rahi hain.
Tarjuman ne kaha ke hukoomat ke aala ohdedar halaat ko mamool par laane ke amal mein shaamil hain aur wazeer e azam Narendra Modi ne awaami tor aman o amaan o bhai charah ko barqarar rakhnay ki Appeal ki hai. Unhoun ne kaha hum darkhwast karte hain ke is hassas mahol ko dekhte huve koi bhi ghair zimma daarana bayan na de. –YTN STAFF