New Delhi: Shumal mashriqi Delhi mein shehriat tarmeemi qanoon ( CAA ) ke khilaaf jari tashadud mein aaj subah bhi zila ke kayi ilaqoun mein pathraou waqeat samnay aeye jis se halaat kasheeda hain. Is mein marnay waloun ki tadaad 9 hogayi hai. Tashadud mein nami fouji dastoun aur Police ke kayi ohdedar sameit 135 afraad zakhmi ho gaye hain.
Police ne halaat ko qaboo mein karne ke liye pooray shumal mashriqi zila mein hukum imtinai nafiz kardiya gaya hai. Police ki janib se jari hukum mein hathyaar ya kisi bhi aag laganay wali ashya par pabandi hai. Social Media par bhi firqa waranah tor per hassas, Ishtial angaiz mawaad likhay jany par bhi pabandi hai. Agar koi bhi shakhs mazkoorah hukum ki khilaaf warzi karta hai to is ke khilaaf sakht karwai ki jaye gi.
Police ke ek ohdedar ne kaha ke Maujpur, Gokalpur¸ Aur Jafraabad sameit deegar ilaqoun mein huve tashadud mein marnay waloun ki tadaad 9 tak poanch gayi hai. Marnay waloun mein ek Head Constable bhi shaamil hai. Wazeh rahay ke itwaar ko mamooli pathrao ke baad peer ko bhar pooray zila mein pur-tashaddud waqeat huve.
Ek sharpasand khulay aam sadak par Firing kar raha tha. Dukanoun mein aag laga di gayi. Ek Petrol Pump ko bhi nazar e aatish kar diya gaya. Gokalpuri raat mein Tyre Market mein aag laga di gayi jisay bujhanay mein Fire brigade ke amlay ko sakht mehnat karni padi. Poray ilaqay mein shaam tak izafi force ko tainaat kiya gaya lekin raat bhar mukhtalif ilaqoun aur galyoun mein pathrao ke waqeat pesh aeye. Der raat fasadyoun ne kuch dukanoun mein lout maar bhi ki. Jafraabad ke tashadud zada ilaqoun mein 3 sahafi phas gaye they jisay 12 bajey raat ke baad Police ne bahefazat baher nikala. –YTN STAFF