New Delhi: Delhi mein ek kapday ke Godown mein aag lagnay se 9 afraad halaak hogaye. Aur mutadid zakhmi hogaye. Ye waqea itwaar ki raat 12:30 bajey dar-ul-hukoomat Delhi ke Kirari ilaqa mein waqay ek kapday ke ek Godown mein pesh aaya. Delhi Fire Services ( DFS ) ke mutabiq ye Godown 3 manzila imarat ke nichli manzil par waqay tha. Imarat mein fire safety ki koi sahoolat nahi thi aur sirf ek seedhi thi.
Aini shahideen ke mutabiq, Godown mein pehlay aag bhadak uthi aur ek Cylinder dhamaka huva. Aur aag poori imarat mein phail gayi. Halaak honay walay aur zakhmi afraad oopar ke floors par so rahay they. Is douran inhen aag se bach ne ke liye bhagnay ka bhi mauqa nahi mila. Zakhmioun ko ilaaj ke liye qareebi hospitals mein daakhil karaya gaya hai.
DFS ne bataya ke 10 afraad ko bazyab karaya gaya aur halaak shudgan mein 2 buzurag aur 4 bachay shaamil hain. Aag lagnay ki wajah maloom nahi ho saki hai. –YTN STAFF