New Delhi: Hindustan ke dar-ul-hukoomat Delhi mein coronavirus ke mareezon ki badhti tadaad mein ek baar phir din bah din record naye mareezon ke izafah aur aalmi waba Covid-19 se honay wali amwaat ki tadaad mein izafay par tashweesh ka izhaar karte hue Delhi congress ke sabiq saddar ajay maken ne chief minister Arvind Kejriwal se fori tor par lockdown laganay ka mutalba kiya hai.
Delhi hukoomat ki wizarat sehat ne 24 ghanton ke douran corona virus ke 8593 naye muamlay report hue aur 85 afraad ki halakat ki ittila hai. Maken ne tweet karkay record mareezon par tashweesh ka izhaar karte hue kaha Arvind Kejriwal jee Delhi mein foran lock down lagao. Delhi mein coronavirus ka record toot gaya hai. guzashta 24 ghanton ke douran covid ke 8,593 naye mareez report hue hain. behtar hoga ke hum Diwali na manayeen, jahan hazaron ( ya laakh se ziyada ) logon ki aakhri diwali saabit nah ho. baraaye meharbani ye ek hungami sorat-e-haal hai. khayaal rahay Delhi mein coronavirus mareezon ki majmoi tadaad badh kar 459975 aur amwat ki majmoi tadaad 7228 hochuki hai.
yaad rahay ke Delhi aur Haryana mein corona ke sab se ziyada naye mareez manzar aam par aarhay hain jaisa ke guzashta 24 ghanton ke douran mulk ki 16 reyaston aur markaz ke zair-e-intizam ilaqon mein coronavirus ke fa-aal mamlaat mein sab se ziyada izafah darj kiya gaya hai jis mein sare fehrist Delhi aur Haryana hai. isi arsa ke douran Delhi mein jahan 1244 fa-aal mamlaat ka izafah hua wahein Haryana mein 692 mamlaat report hue hain.
Jumaraat ko sehat aur khandani behbood wizarat ki janib se jari adaad wo shumar ke mutabiq guzashta 24 ghanton ke douran mulk bhar mein coronavirus ke 47905 naye mamlaat samnay aaye hain, jisse is waba se mutasirah afraad ki tadaad taqreeban 86. 84 laakh aur isi douran marnay walon majmoi tadaad 1.28 laakh tak pahonch gayi. Isi muddat ke douran, 52718 afraad sehat yab hue hain, jis ke baad is waba se sehat yabi haasil karne walay mareezon ki tadaad badh kar 80.66 laakh se ziyada hogayi hai. virus ke naye mamlaat ke muqaabla mein seht yab honay walay mareezon ki ziyada tadaad ki wajah se fa-aal mamlaat 5363 se ghatt kar majmoi tadaad 489294 reh gayi.