New Delhi: Congress sadar Sonia Gandhi ne party ke ek numainda wafad ku shumal mashriqi Delhi ke fasaad zada ilaqoun ka dora kar halaat ka jaiza laine ke liye kaha hai. Is 5 rukni wafad mein Mukul Wasnik, Shaktisinh Gohil, Kumari Selja, Tariq Anwar aur Sushmita Dev shaamil hain. Party ke tanzeemi General Secretary K.C Vinogopal ki janib se jari bayan ke mutabiq ye numainda wafad mutasirah ilaqoun ka dora karne ke baad apni Report Congress sadar ko sonpe ga.
Ghhor talabb hai ke is se pehlay Congress ka ek numainda wafad jumaraat ko sadar jamhooria se mila tha jis mein Sonia Gandhi, Priyanka Gandhi aur sabiq wazeer e azam Manmohan Singh bhi shaamil thay. Sadar jamhooria se milne ke baad Sonia Gandhi ne Media se baat karte huve kaha tha ke hum ne wazeer e dakhla ko hataane ka mutalba kiya hai. Unhoun ne kaha tha ke Delhi mein bhadkey tashadud ko wazeer e dakhla rokne mein nakaam rahay. Shumal mashriqi Delhi mein tashadud badta gaya aur logoun ki jaanen jati rahen. 200 se ziyada loog zakhmi hove aur hukoomat khamosh tamashaayi bani baithi rahi. Hum ne sadar jamhooria se wazeer e dakhla ko hataane ka mutalba kiya hai. Hum umeed karte hain ke sadar jamhooria zurori qadam athayin ge. Wazeh rahay ke Delhi tashadud mein ab tak 42 logoun ki mout ho gayi hai aur 200 se ziyada logoun ke zakhmi hone ki khabar hai. –YTN STAFF