New Delhi: Delhi fasaad mein sharpasandoun aur afwao phelanay waloun ke khilaaf Delhi Police ne karwai shuru ki aur is douran kayi ek giraftaryan bhi amal mein ayen hain lekin is douran afwaah ki padaash mein giraftar honay wala shakhs na sirf police ki hirasat se na sirf faraar hogaya balkay is ne khud kashi bhi karli hai.
Shumal mashriqi Delhi mein tashadud ke waqeat mein mehloken ki tadaad badh kar 53 hogayi hai aur un waqeat ki jaanch bhi mukhtalif Teams ke zareya ki ja rahi hai. Is darmiyan afwaah phelanay walay kayi logoun ko Police ne giraftar bhi kiya hai jin mein se ek ki mout ki khabar hai. Tafseelaat ke mutabiq Ranjit Nagar ilaqa mein sar aam ghoom kar afwaah phelanay walay nojawan 23 sala Anshoman ne Police se bhaag kar khudkushi kar li hai. Bataya ja raha hai ke usay Police ne guzashta dinoun giraftar kiya tha lekin wo kisi terhan faraar ho gaya aur khudkushi kar li.
Is waqea ke baad Police mehakma mein hungama barpaa ho hai. DCP ne muamlay mein laparwai baratnay ke liye ek SI sameit 4 Police ohdedaroun ko moattal kar diya hai. Is poooray waqea ki Magisterial jaanch karwaye jaany ka hukum bhi sadir kar diya gaya hai.
Khabroun ke mutabiq Ranjit Nagar sameit poori Delhi mein fasadaat ki afwaah ki wajah se afra tafri ka mahol peda ho gaya tha. Ranjit Nagar ke Pando Nagar mein zabardast afra tafri ka mahol tha aur ek nowjawan talwar le kar barsar aam ghoom raha tha. Is ki shikayat logoun ne muqami Police se ki. Police ne ilaqay mein nasb CCTV Footage ki bunyaad par mulzim Anshoman ko pakad liya. Police ne Anshoman ke khilaaf afwaah phelanay aur Arms Act ki dafaa lagatay huve FIR darj ki.
Zaraye ner kaha hai ke peer ki der raat Police ki ek team Anshoman ko le kar is ke ghar par talwar bar aamad karne ke liye gayi thi aur Anshoman ko ek Constable ke bharoosay chod kar Police ki baqi Team ghar ki talashi le rahi thi. Isi waqt mulzim Anshoman mauqa dekh kar Constable ko dhaka day kar ghar ki teesri manzil par chadh gaya. Is douran wahan par afra tafri mach gayi aur Police Team shore machate huve nowjawan ke peechay dodhۙ. Khud ko pakda jata dekh kar nowjawan ne apne ghar ki teesri manzil se neechay chhalang laga di. Is ki wajah se wo buri terhan zakhmi hogaya. Police ne usay muqami dawakhane mein daakhil karwaya jahan is ki mout hogayi. Baad azan Police ne Doctors ke Board ke zareya laash ko Postmortem karwanay ke baad ghar waloun ke supurd kar diya.
Is waqea ke baad ilaqay mein kasheedgi hai. Kharab mahol ko dekhte huve Police ne ilaqay mein izafi Security tainaat kar diya hai. Is ke sath hi ilaqay ke muaziz logoun se bhi aman qaim rakhnay mein taawun ke liye kaha gaya hai. Ek Police ohdedar ne kaha hai ke is muamlay ki jaanch ki bunyaad par agay ki karwai ki jaye gi. –YTN STAFF