Johannesburg: Subukdosh ho chukay janoobi Africa ke sabiq Captain AB de Villiers ko Twenty 20 World Cup ke liye team mein shaamil karne se qabal inhen khud ko saabit karna hoga. Un khayalat ka izhaar team ke Head Couch Mark Boucher ne kiya hai. Guzashta December mein janoobi Africi team ke Head Couch ka ohda sambhaalte hi Boucher ne kaha tha ke wo chand un khiladioun ko team mein dobarah wapas laane ki koshish karen ge jinhoun ne haliya dinoun mein subuk doshi ikhtiyar ki hai jin mein khaas kar World Cup ke liye AB de Villiers ka naam sab se oopar hai.
Australia mein ICC ka Twenty 20 World Cup rawan baras October aur November mein khela jaye ga jis ke liye AB de Villiers ki Africi team mein wapsi ki qiyaas aaraiyan jari hain. Boucher ne kaha ke de Villiers ne Media aur awam mein wapsi ke mutaliq tabadlah khayaal kiya hai lekin unhoun ne mujh se dobado ezharkhyal nahi kiya hai. Boucher ne wazeh kiya hai ke meri un se guftagu huvi hai aur hum anqareeb de Villiers ke sath kiye jaaney walay faisla par hatmi bayan wazeh karen ge. Boucher England ke khilaaf 3 muqabloun ki T20 Series mein maizban team ki 2-1 ki shikast ke baad ezharkhyal kiya aur kaha ke mein ne ohda sanbhalne ke pehlay din se kaha hai ke World Cup ke liye behtareen Team muntakhib karen ge. –YTN STAFF