London: Bartania ke shehar Liverpoll se kam omri mein husn ka muqaabla jeetne wali sabiq dosheeza ko shiddat pasand tanzeem Dayesh ki maali madad karne aur is tanzeem ke jangju se shadi karne ke ilzaam mein jail bhaij diya gaya. Sabiq haseena 21 sala Amaani Noor ko Bartania police ne giraftari ke baad 2 haftay qabal adalat mein pesh kiya tha aur guzashta haftay un par Dayesh jangju se shadi karne aur shiddat pasand tanzeem ko maali muawnat faraham karne jaisay ilzamaat ki fard jurm aed ki gayi thi.
Amaani Noor par ilzaam tha ke unhoun ne apni 20 we saalgirah ke din Dayesh ke ek jangju se online shadi ki, Jis se Amaani Noor ke kuch arsa qabal hi taluqaat ustuwar hue they. Un par ilzaam tha ke unhoun ne Dayesh ke jangju Hakim Noor nami shakhs se Amaani Noor ne misijng application Telegram par shadi ki thi, Bartania khatoon aur Dayesh jangju ka rabita bhi internet par huva tha aur dono ne kabhi bhi mulaqaat nahi ki thi, Taham internet par taluqaat ustuwar hone ke baad dono ne shadi ki.
Un par ye ilzaam bhi tha ke unhoun ne Dayesh ko 35 pound se zayed ki maali muawnat bhi faraham ki, Taham unhoun ne is ilzaam se inkaar kiya tha aur kaha tha ke unhoun ne Dayesh ki maali muawnat nahi ki balkay unhoun ne khanah jungi ke shikaar mulk Shaam mein bachoun aur khawateen ke liye khoraak kharedne ke liye pesey faraham kiye.
Guzashta haftay Bartania adalat ko Amaani Noor muqadma mein aagahi di gayi thi ke police ne Amaani Noor ke ghar se Turkey ka Air ticket bhi bar aamad kiya jis ke zariye Amaani Noor Turkey ke rastay Shaam jaakar Dayesh mein shamoliat ka iradah rakhti then.
Taham Amaani Noor ne adalat ko bataya tha ke un ka Dayesh mein shamoliat ka koi iradah nahi tha, Taham wo apne shohar ke paas jana chahti then. Amaani Noor ne adalat ko ye bhi bataya tha ke unhoun ne apne sabiq Boyfriend Liverpool football club ke khiladi ki janib se dhokay ke baad mazhab ko jan-ne ka iradah kiya aur isi liye hi unhoun ne Dayesh ke jangju se online shadi ki thi. Taham ab adalat ne inhen Dayesh ki maali madad karne ke ilzaam mein jail bhaij diya.
Amaani Noor guzashta haftay walida ke sath adalat mein pesh huien then, Unhoun ne apne khud par lagaye gaye ilzamaat ko mustard kiya hai. Adalat ne jurm saabit hone par 21 sala Amaani Noor ko 18 mah ke liye jail bhaij diya. Adalat ne Amaani Noor ko Dayesh ko maali madad faraham karne ke liye uksane wali Bartania khatoon 28 sala Victoria Webster ko bhi 17 mah ke liye qaid ki saza sunai.
Victoria Webster par ilzaam tha ke unhoun ne hi Amaani Noor ko Dayesh ko maali madad daine ke liye uksaya aur khud Amaani Noor ne bhi adalat ko bataya tha ke unhoun ne Bartania khatoon ke kehne ke baad hi raqam di thi, Taham unhoun ne daawa kiya tha ke unhoun ne Shaam mein bachoun aur khawateen ki Falah-o-behbood ke liye raqam di thi. Adalat ki janib se shiddat pasand tanzeem ko maali muawnat faraham karne ke ilzaam mein saza sunee jane ke baad Amaani Noor aur Victoria Webster jazbati hogai aur unhoun ne adalat mein rona shuru kardiya.
Khayaal rahay ke Amaani Noor 18 saal ki omar mein Miss Teen Liverpool muntakhib hui then aur un ke taluqaat footballer Sheyi Ojo se bhi rahay hain. Amaani Noor ke footballer ke sath taluqaat Miss teen muntakhib hone se qabal hi they aur ye aizaz haasil karne ke baad dono ke taluqaat kharab hona shuru hue jis ke baad unhoun ne 20 saal ki omar mein Dayesh ke jangju se online shadi karli thi. –YTN STAFF