Mumbai: Maharashtra ki siyasat ne hafta ki subah ek zabardast karwat is waqt badli jab BJP Leader Davindra Fadnavis ne ek baar phir Chief Minister ke ohda ka halaf le liya. Davindra Fadnavis ko dobarah Chief Minister bananay may ahem kirdaar nibhaya hai NCP ne. wohi NCP jis ke sath milkar Shive Sena hukoomat saazi ka daawa kar rahi thi. jummay ki raat tak Shive Sena, Congress aur NCP ki mushtarqa hukoomat ban’nay ki baat sabhi Media Channel keh rahay they, lekin hafta ki subah Maharashtra ki siyasat may is waqt kohram mach gaya jab taqreeban 8 bajey Davindra Fadnavisne Chief Minister aur NCP leader Ajith Pawar ne naib Chief Minister ohda ka halaf liya.
Is naye siyasi mahol ne Shive Sena ko zabardast jhatka pohanchaya hai. Shive Sena ne jummay ko kaha tha ke Congress aur NCP se sabhi mamlaat aur masail par baat cheet ho gayi hai aur mutafiqa tor par Shive Sena se 5 saal ka Chief Minister banaye jaany ka faisla huwa hai. NCP wo congress ke kayi Leaders bhi kayi martaba wazeh lafzoun may is terhan ka bayan diya ke wo Shive Sena ke sath hukoomat saazi karne ke liye tayyar hain aur is maqsad se ek kam az kam mushtarqa Programme bhi tayyar kiya gaya hai.
Naye siyasi mahol may ek taraf jahan BJP may khushii ka mahol hai, wahein Shive Sena ki taraf se koi radd-e-amal samnay nahi aaya hai. kuch zaraye ka ye zaroor kehna hai ke Sharad Pawar aur Uddhav Thackray ke darmain baat cheet hui hai aur NCP sarbarah Sharad Pawar ne unhein saaf lafzoun may kaha hai ke is pooray muamlay ki unhein koi ilm hi nahi hai. NCP ke Senior Leader Praful Patel ne bhi ek News Report se baat cheet karte hue kaha ke Sharad Pawar ko naye siyasi mahol ke baray may pehlay se koi maloomat nahi thi. darin Isna Maharashtra ke Chief Minister ka halaf lainay ke baad Davindra Fadnavis ko mubarakbad diya milnay ka silsila shuru ho gaya hai. Wazeer-e-Azam Narendra Modi aur markazi wazeer-e-dakhla Amit Shah ne Fadnavis ke Chief Minister ban’nay par khushii ka izhaar kiya hai aur umeed zahir ki hai ke wo awam ke hak may kaam karen ge.
Narendra Modi ne apne Twit may likha hai ke Davindra Fadnavis ji aur Ajit Pawar ji ko ba tarteeb Chief Minister aur naib Chief Minister ohda ka halaf lainay par mubarakbaad. mujhe yaqeen hai ke wo Maharashtra ke roshan mustaqbil ke liye lagan se kaam karen ge. Amit Shah ne bhi Fadnavis ke sath sath NCP Leader Ajit Pawar ko naib Chief Minister ban’nay par mubarakbaad di. –YTN STAFF