Hyderabad: National Crime Record Bureau ki janib se dastyab adaad-o-shumaar ke mutabiq riyasat Karnataka 12020, Uttar Pradesh 11416 aur Maharashtra 4967 ke baad 2019 mein riyasat Telangana Cyber Crime muqadmaat mein choutha maqam par raha aur Telangana mein is arsa ke douran 2691 muqadmaat darj hue hain. IT Act juraim ke tehat Telangana mein majmoi tor par Cyber Crime 1629 muqadmaat darj kiye gaye, Jin mein se 1486 computer se mutaliqa juraim hain.
Doosri reyaston ki sorat-e-haal ke muqaabla mein yeh teesra bada waqea hai. Computer se mutaliqa juraim ke muqadmaat mein Run some where hamlay ( 3 ), Shanakht ki chori ( 22 ), Naqali ke zareya dhoka dahi ( 1445 ), Electronic shakal mein fehash / Jinsi tor par wazeh feal ki ashaat / Tarseel ( 139 ) Shaamil hain. Is ke ilawa Cyber Black mailing ( 23 ) aur social media par jaali khabrain shaya karne ke ilawa khawateen aur bachon ( 37 ) aur data chori ( 174 ), Cyber stalking ( 174 ) muqadmaat sab se ziyada hain. Is ke ilawa Telangana police ne khawateen ke khilaaf cyber juraim mein mulawis ja-al sazoon ke khilaaf bhi muqadmaat darj kiye hain.
Riyasat mein darj cyber crime ke beshtar muqadmaat mein, Jurm ka irtikaab karne ka muharrik dhoka dahi ( 2013 ) hain aur is ke baad jinsi istehsal ( 78 ), Extortion ( 49 ), Zaati intiqam ( 11 ) aur deegar muqadmaat rahay. Telangana police ne 2019 mein 748 afraad ( 718 mard aur 30 khawateen ) ko giraftar kiya aur 1564 Cyber mujrimon ( 946 mard aur 618 khawateen ) ke khilaaf charge sheet daakhil kee. Metropolitan shehron mein Cyber Crime ke tajziye ke mutabiq Hyderabad ko 1379 muqadmaat ke sath teesra maqam haasil huwa hai jabkay is fehrist mein Bengaloru 10555 muqadamaat ke sath pehla aur Mumbai ko 2527 muqadmaat ke sath teesra maqam mila hai.