New York: America ke sadar Donald Trump ne ek martaba phir Coronavirus ke muamlay par China ko sakht tanqeed ka nishana banatay huve naya tirf laganay ki dhamki di hai. Francesi khabar rasan Agency ke mutabiq sadar Trump ne kaha ke un ke paas is baat ka saboot hai ke ye Virus Wuhan ki ek Laboratory mein tayyar kiya gaya.
Adaad o shumaar batatay hain ke America mein Coronavirus aur Lockdown ke intahi manfi asraat samnay aeye hain aur 6 haftoun mein 3 Crore se zayed Americi mulazimatoun se haath dho baithy hain jis ke baad Republic sadar ke ravayye mein mazeed talkhi peda hogayi hai.
Duniya ki sab se badi maeeshat America ki kharab haalat ke baad mahireen ne Europe ki muashi soorat e haal se mutaliq bhi badi tabahi se khabardaar kiya hai. Duniya mein Coronavirus ki waba se ab tak 2 lakh 30 hazaar se zayed afraad halaak ho chuke hain aur duniya ki aadhi abadi ek qisam ke Lockdown ke neechay zindagi guzaar rahi hai jis se mayeshtin zaboon haali ka shikaar hogayi hain.
Coronavirus ke baaray mein gumaan ye kiya jata hai ke ye guzashta baras China ke shehar Wuhan ki ek aisi Market se phela jahan zindah jungli janwar farokht kiye jatay hain, Taham ye qiyaas aarayyan bhi gardish kar rahi hain ke ye Virus Wuhan ki ek khufia laboratory mein tayyar kiya gaya.
Is hawalay se jab sadar Trump se sawal kiya gaya ke kya wo aetmaad ke sath keh satke hain ke Wuhan Institute of Virology mein hi is Virus ko tayyar kiya gaya hai is sawal ke jawab mein sadar ne kaha jee haan. Jab White House mein Reporters ne sadar par zor diya ke is baaray mein itnay yaqeen aur aetmaad se kaisay keh satke hain, Is par sadar Trump ne kaha ke ye mein aap ko nahi bata sakta. Saddar Trump musalsal China par Coronavirus phelanay ka ilzaam laga rahay hain aur keh rahay hain ke is ka maqsad rawan baras November mein honay walay sadaarti intikhab mein inhen shikast se dochar karna hai. –YTN STAFF