Manama: Coronavirus ne jahan mashriq aur maghrib ke mukhtalif mumalik mein senkdoun afraad ko luqmah ajal bana diya hai wahein shadi ke gharoun mein baratioun aur mehmanoun mein bhi khauf o heraas ki lehar daud gayi hai aur is mohlik marz se khud ko mehfooz rakhnay ke liye loog mukhtalif aur ajeeb tareeqay ikhtiyar kar rahay hain. Bahrain mein ek dulhay ne dawat ke Cards jari karkay mehmanoun par ajeeb o ghareeb pabandi aed kar di. Pabandi Coronavirus ke phelao se bachao ke pesh e nazar lagai gayi.
Dulhe ne shadi ghar ke Gate par ek ibaarat chaspan ki hai jis mein mehmanoun ka kher muqaddam karte huve un se darkhwast ki gayi hai ke aap ki aur hamari salamti ke liye darkhwast hai ke Salam karte waqt sirf musafha par ektafa kiya jaye. Arab moasheroun ki rivayet hai ke maheman Dulhe se melitay waqt usay bosa dete hain jabkay dulha apne khandan ke buzurgoun ko Salam karte waqt un ki peshani choomta hai. Nai pabandi Coronavirus ke khauf se lagai gayi hai.
Bahrain dulhay ki ye darkhwast ke apni aur hamari salamti ke liye sirf musafhe par ektafa karen is ki Video Social Media par Viral hogayi. Bahrain wizarat sahet ne elaan kiya tha ke Coronavirus ke mazeed saat mareezoun ki tashkez huvi hai. Is terhan Bahrain mein Corona se mutasireen ki majmoi tadaad 33 tak poanch gayi hai. Bahrain hakkaam ne kaha hai ke Corona se beshtar mutasireen Iran se Manama puhanche hain. –YTN STAFF