Cairo: Duniya bhar mein phaily coronavirus ki waba ke baais agarchay shadi ki taqrebaat multawi kardi gayi hain, taham is bawajood duniya bhar mein loog mehdood afraad ki mojoodgi mein shadi kar rahay hain aur sath hi online shadioun mein bhi izafah huva hai. Taham mashriq wasti ke Mulk Misar mein corona ke mareezoun ka ilaaj karne walay 2 Doctors ne waba ke dinoun mein mangni karkay nah sirf mareezoun ke cheharoun par khusihyan bekhirin balkay un ki mangni ki tasaveer duniya bhar mein viral hogayen.
Social media par Viral honay wali tasaveer mein daawa kiya gaya tha ke Misar ki khatoon Doctor corona ke mard mareez ka ilaaj karte karte saathi Dr ki mohabbat mein nah sirf giraftar huven balkay un se mangni bhi kar daali. Taham haqeeqat mein aisa nahi balkay wo dono hi Doctors hain aur kaafi arsay se ek hi dawakhana main duty ke faraiz sar anjaam day rahay they aur dono ke darmain pehlay se hi taluqaat they.
Misar ke Arab nashriyati idaray Al-khaber Al-Jadeed ke mutabiq social media par Viral honay wali tasaveer khatoon Dr aur corona ke mareez ki nahi balkay ek hi dawakhana ke doctors ki hain, Jinhoun ney munfarid andaaz mein nah sirf mangni ki balkay apni mangni ko yadgar bananay ke liye unhoun ne Photography bhi karwai. Report mein bataya gaya ke social media par tasaveer Viral honay ke baad jab muamlay ki tehqeeq ki gayi to pata chala ke mangni karne walay dono afraad ek hi dawakhana ke Doctors hain.
Report ke mutabiq khatoon Dr.Aaya Al Masbah aur Mohammad Fehmi Misar ke shehar Mansoura ke dar ul shefa dawakhana mein ek sath khidmaat sar anjaam dete they aur dono ke darmain pehlay se hi taluqaat they. Photographer ki post se is baat ka andaza nahi hota ke wo dono doctors hain, Taham un ki tasaveer ko dekh kar andaza hota hai ke dono ki mulaqaat dawakhana mai huvi aur phir un ki mulakaatein mohabbat mein tabdeel huven, Jis ke baad unhoun ne mangni karli.
Mazeed maloom huva ke darasal dono doctors hain aur unhoun ney corona se ehthiyat ka shaoor ujagar karne ke liye apni mangni ki munfarid Photography karwai. Misar ki websites ke mutabiq dono ney Photographer ke mashwaray ke baad dawakhana mai hi Photography karwai jo dekhte hi dekhte Viral hogayi aur dono ko mareez aur Dr ki mohabbat ka naam diya gaya.
Lekin jab Misar ke muqami khabar rasan aur Websites ney muamlay ki tafteesh ki to maloom huva ke darasal dono doctors hain aur unhoun ney corona se ahthyat ka shaoor ujagar karne ke liye apni mangni ki munfarid Photography karwayi. –YTN STAFF`