Hyderabad : Congress ke senior leader aur sabiq wazeer Mohammad Ali Shabbir ney mangal ko Rajya sabha mein teen Talaq bill ki manzoori mein BJP ki himayat karne par TRS ki shadeed muzammat ki hai.
Mohammad Ali Shabir ney ek bayan mein kaha ke BJP hukoomat teen Talaq bill ko lok sabha mein teen baar Manzoor karanay ke ba-wujood, pichle 19 mahino se Rajya sabha mein yeh bill Manzoor nahi kara pa rahi thi. Congress party aur deegar opposition partiyan chahti theen ke yeh bill select committee ko bhej diya jaye. taham BJP hukoomat ney TRS jaisay khufia halifoun ko vote daalnay se roktay hue back dor ka tareeqa apnatay hue bill ki manzoori ko yakheeni banaya hai.
Shabbir Ali ney kaha ke NDA hukoomat ko ewaan baala mein muslim khawateen ( Shadi Par Huqooq ke tahaffuz ) bill ko Manzoor karne ke liye matlooba aksariyat nahi hai, lekin is ney TRS jaisi ghair Secular jamaatoun ko voting se daur rakha, jisse 240 arkaan Rajya sabha ki mo-asar taaqat aur aksariyat ko gira diya.
Unhoun ney kaha ke vote daalnay se parhez karte hue TRS ney apne aap ko be-naqaab kar diya hai. aur yeh baat baghair shak ke saabit hochuki hai ke woh BJP ki Haleef hai. aur NDA hukoomat mein ghair rasmi tor par shiraakat daar hai.
Congress hamesha yeh kehti rahi hai ke TRS BJP ki B- team hai. aur aaj hamara yeh muaqqaf durust saabit hua, agar TRS waqai Secular hoti, to usay bill ke khilaaf vote dena chahiye tha. lekin is ney BJP ka sath diya. Shabir Ali ney ilzaam lagaya ke KCR ney muslim tabqa ki peeth par waar kya hai.
Congress rehnuma ney kaha ke TRS kabhi Secular party nahi thi, aur iska musalmanoun ke khilaaf posheeda agenda hai. tamam ulama aur muslim tanzeemen ko TRS ki himayat kar rahi hain, inhen ab apne muaqqaf ka jaeizah lena chahiye.
Shabir Ali ney kaha ke poori muslim community ko intikhabaat mein TRS ki himayat karne ki ghalti ki saza bhagat rahi hai. unhon ney kaha ke kam az kam ulama.
Aur tanzeemoun ko apni ghalti ka ehsas karna chahiye. MIM 2014 se TRS ki himayat kar rahi hai. ab jabkay teen Talaq bill se mutaliq TRS aur KCR ka asli chehra be-naqaab ho gaya hai. MIM aur Asad owaisi ko ab TRS se mutaliq apna muaqqaf wazeh karna chahiye.
Shabir Ali ney kaha ke KCR ko ab khud ko secular aur BJP mukhalif keh kar muslim tabqa ko gumraah karne se Basaz aajana chahiye. –YTN STAFF