New Delhi : Lok sabha intikhabaat mein Congress ki haar ke baad se hi party ki Mushkilein kam hoti nahi dikhaai day rahi hain. pehlay Rahul Gandhi ney congress sadar ke ohda se istifa day diya tha, to ab congress party ke Senior leader aur Rukan Rajya sabha Sanjay singh be party se istifa day diya hai.
Amethi ke rehne walay Sanjay singh, Shahi khandan se talluq rakhtay hain. Assam se congress ke Rajya sabha rukan hain. unhon ney is lok sabha intikhabaat mein congress ki seat par Sultan pur se intikhab bhi lada tha, congress chodney ke sath hi ab Sanjay singh ke BJP mein shaamil honay ke andaishay zahir kiye ja rahay hain.
Sanjay singh ney Istefa dainay ke baad kaha ke bad qismati se congress apne maazi mein jee rahi hai. aur mustaqbil se be-khabar hai. mein ney mehsoos kiya ke aaj mulk ke PM Modi ke sath hai. agar Mulk PM Modi ke sath hai to mein bhi PM ke sath hon. mein kal hi BJP mein shaamil honay ja raha hon. mein ney party se istifa dainay ke sath sath Rajya sabha ki rukniat se bhi istifa day diya hai.
Congress party se mutaliq unhon ney mazeed kaha ke lok sabha intikhabaat mein 52 seats par simat jaaney wali congress ko mukhtalif reyaston mein haar ka saamna karna pada. yeh ghareebon ko maali imdaad faraham karne ka wada karne ke bawajood himayat haasil karne mein nakaam rahay. Sanjay singh ney kaha ke Rahul gandhi ke sadaarti ohda se istifa dainay ke baad party ko ghair yaqeeni surat-e-haal ka saamna karna pad raha hai.
Unhon ney pur zor kaha ke party ke Senior qaideen ki janib se inhen ohda par bar qarar rahnay ki darkhwast karne ke bawajood, woh is par dobarah nazar sani nahi karenge.
Wazeh hoke in dinon mukhtalif partiyon ke qaideen BJP mein shaamil ho rahay hain. samaaj waadi party, TDP aur TMC ke bohat se rehnuma, haliya mahino mein BJP mein shaamil hoye hain. SP ke rukan Rajya sabha Niraj shekhar ney haal hi mein BJP mein shamoliat ikhtiyar ki hai. imkaan hai ke maghribi bengal mein assembly intikhabaat se qabal TMC ke kuch aur rehnuma, hukmuran party mein shaamil hosakte hain. –YTN STAFF