Friday, March 29, 2024
HomeIndiaCongress ke senior leader Ahmed patel ka inteqaal

Congress ke senior leader Ahmed patel ka inteqaal

New Delhi: Ye khabar afsos ke sath aur khaas kar cogressi halqon mein kaafi takleef ke sath padhi jayegi ke party ke senior leader Ahmed patel ab is dunya mein nahi rahay.

Congress ke senior leader aur congress ki sadar Sonia Gandhi ke siyasi musheer aur behtar saathi manay jane walay Ahmed patel ka aaj subah 3:30 bajey inteqaal hogaya.

Ahmed patel ek maheena qabal mohalik beemari corona se mutasir hue thay. jiske baad inhen Gurugram ke dawakhana mein ilaaj ke liye daakhil kiya gaya tha. 15 November se hi woh dawakhana mein hain aur ICU mein unkia ilaaj jari tha.

Ahmed patel ke betay Faisal patel ne unke inteqaal ki khabar Twitter ke zareya di. jaisay hi Ahmed patel ke intqaal ki khabar manzar-e-aam par aayi siyasi leadron ke alawa awam ne apne taziyati paighamaat dena shuru kardiya jis mein Narendra modi, Sonia gandhi, Rahul gandhi aur deegar kayi qaideen aur ahem shakhsiyatein shaamil hain.

Ahmed patel ke intqaal par Wazeer-e-Azam aur congress ke senior leaidran samait mutadid ahem shaksiaat ne gham ka izhaar kiya hai.

Faisal patel ne tweet kar ke ittila di aur tweet kiya intehai afsos ke sath ye ittila deeni padh rahi hai ke mere waalid Ahmed patel ka 25 November ko raat 3: 30 par inteqaal hogaya.

Taqreeban ek maheena qabal unke corona misbet paye jane ke baad se unki tabiyat kharab thi. unke kayi aaza kaam karna band kar chuke thay. Allah inhen jannat mein aala maqam ataa farmaiye.

Waalid ke intqaal ki khabar dainay ke alawa Faisal ne apne awam se darkhwast ki hai ke woh corona se hifazat ke liye tamam usoolon ki pasdari karen, ijtima na karen aur har waqt samaji faasla par amal karen. Congress ke senior rehnuma Ahmed patel ke inteqaal par Wazeer-e -Azam ne tweet kya aur kaha ke Ahmed patel ka intqaal afsoosnaak hai. unhon ne kayi saal awaami zindagi mein guzaray aur samaaj ki khidmat ki. Congress sadar Sonia gandhi ne kaha ke Ahmed patel ke intqaal se mein ne ek aisa saathi kho diya hai jiski poori zindagi congress ke liye waqf thi.

Congress ke sabiq sadar Rahul gandhi ne tweet kya aur kaha ke yeh bohat dukh bhara din hai. Ahmed patel congress party ke ahem sutoon thay. unhon ne aakhri saans tak congress ko taqwiyat di aur har mushkil waqt mein party ke sath kharray rahay. woh ek azeem asasa thay. hum unki kami hamesha mehsoos karenge.