Hyderabad : Hyderabad City Congress Committee ( HCCC ) aqliati mehakma ke chairman sameer walii ullah aur TPCC ke tarjuman Syed Nizam Uddin ne healthier hearts foundation ke taawun se hafta ke roz Golconda ke Mirza palace function hall mein muft health camp ka ineqad amal mein laya.
TPCC ke car-guzaar saddar ponnam prabhkar, sangareddy se congress ke rukan-e-assembly Jagga Reddy , TPCC mehakma aqliat ke chairman Sheikh Abdul ullah Sohail aur deegar senior rehnumao ne health camp ka doura kiya. unhon ne un ghareeb logon ko darpaish mushkilaat ke badey mein muqami logon se baat cheet ki.
Media se baat karte hue, Jagga Reddy ne sameer walii ullah aur syed Nizam Uddin ke is iqdaam ko saraha. unhon ne kaha ke ”is health camp se senkdon ghareeb afraad mustafeed honge, jo kayi tibbi maiynoun ke akhrajaat bardasht nahi kar sakte hain.
Is iqdaam ki tareef karte hue congress ke karguzar sadar ponnam prabhakar ne mashwara diya ke riyasat bhar mein aisay hi health camp ka ineqad amal mein laaye jayen. unhon ne reyasti hukoomat par awaami sahet ke taluq se ghaflat baratnay ka ilzaam lagaya.
Unhon ne kaha ke muft health campon mein anay walay logon se saaf zahir hota hai ke kachi aabadiyon mein rehne walay ghareeb afraad ko bunyadi tibbi sahuliyaat nahi mil rahi hain. unhon ne kaha ke muft health camp ka ineqad zaroorat mand logon ki madad karne ke liye achi koshish hai.
Sameer waliiullah ne bataya ki ECG, 2D echo, blood test, sugar GRBS , BP , sameit mukhtalif tibbi test health camp mein kiye gaye aur dawaein bhi muft faraham ki gayeen. unhon ne bataya ke camp mein mahireen amraaz-e-qalb sameit aam dr aur mahireen dastyab they.
Wahein. TPCC ke tarjuman Syed Nizam Uddin ne bataya ke 29 September ko Rasoolpura mein ek aur health camp ka ineqad kiya jayega. unhon ne makhsoos ilaaqon mein rehne walay logon se appeal ki ke woh health campon mein shirkat karkay is mauqa se istifada haasil karen. –YTN STAFF