Amravati: Riyasat Andhra pradesh ke sabiq chief minister Nara Chandrababu Naidu ke gardish ke din khatam honay ka naam nahi le rahay hain kyunkay ab capital region development authority ( CRDA) Chandrababu Naidu ki qiyamgah se mut-tasil waqay conference hall ko munhadim karne ke baad darya ke qareeb Naidu ki qayamgah ko munhadim karne ki tayari kar raha hai aur is ney is silsila mein notice jari kardi hai. zonal assistant director Narendra reddy ki zair-e-qayadat CRDA ke ohdedar jummay ki subah Naidu ki qiyamgah puhanche aur imarat ke maalik L.Ramesh ko notice hawalay ki .
Sabiq chief minister aur AP assembly mein opposition leader Chandrababu Naidu guzashta teen barson se darya ke kinare waqay is makaan mein qiyam Pazeer hain. ohdedaron ney Naidu ki qiyamgah ke asal baab-ud-dakhla par bhi notice chipsaan kardi. CRDA ke ohdedaron ney maalik makaan sanatcar L.Ramesh ko is imarat ko khaali karne ke liye ek hafta ka waqt diya. agar ek hafta ke andar maalik makaan koi jawab nahi dete hain to makan jis mein Chandrababu Naidu qiyam Pazeer munahdam kardiya jayega.
Wazeh rahay ke yeh makaan dareaye krishna se chand meter ki doori par waqay hai. CRDA ke mutabiq darya ke pani se 100 meter ke andar kisi bhi imarat ko taamer nahi kiya jana chahiye. isi douran media se baat karte hue sabiq wazeer wo telugu desam ke leader Y.Ram krishna ney kaha ke jab mutahidda Andhra pradesh ke chief minister YS Rajshekhar Reddy they to is waqt is makaan ki taamer ki ijazat di gayi thi. unhoun ney kaha ke darya ka tahaffuz karne walay idaara ney bhi is ke maalik L.Ramesh ko darya ke kinare makaan ki taamer ki ijazat di thi. jab yeh imarat taamer ki gayi thi to is waqt CRDA nahi tha. sabiq wazeer ney is makaan ko munhadim karne ke liye jari kardah notice ko mukhasimat ki karwai qarar diya. –YTN STAFF