Kadapa: CBI jo mutahidda Andhra Pradesh ke sabiq wazeer YS Vivekananda Reddy ke sansani khaiz qatal maamla ki jaanch kar rahi hai, Ek martaba phir un ki Dukhtar Sunita Reddy se pooch tach ki. Jaanch karne walay ohdedaron neh is mangal ko un se Kadapa Central Jail ke Huest House mein taqreeban 6 ghantay pooch tach ki thi. Ek martaba phir un ko aaj talabb karte hue taqreeban 2 ghantay pooch tach ki. Samjha jata hai ke Sunita neh qaumi Agency ke ohdedaron ko is silsila mein ahem maloomat faraham ki hain.
Qabal azeen is mah ki 29 tareekh ko Agency nay hukmaran jamaat YSR Congress ke reyasti secretary Devi Reddy Shiva Reddy se Kadapa zila mein pooch tach ki thi. Un ka naam un 15 mushtaba afraad ki fehrist mein samnay aaya hai jo fehrist AP High Court mein Sunita Reddy ney pesh ki thi aur aaj ek martaba phir ohdedaron nay Sunita Reddy se pooch tach ki. Chunkay Sunita Reddy nay Shiva Reddy ke mujremana pas manzar par un ki taraf nishandahi ki thi, Isi liye aaj Sunita Reddy se ohdedaron nay Shiva Reddy ke barey mein mazeed maloomat haasil kee.
Wazeh rahay ke AP High Court ney Sunita Reddy ki arzi par is maamla ki jaanch SIT se CBI ke hawalay ki thi. Police ney 15 March 2019 ko is qatal ke silsila mein ek maamla darj kiya tha. SIT ke ohdedaron ney taqreeban 1300 afraad bashmole beshtar siyasi shaksiaat, YSR Congress, Telugu Desam Party ke leaders aur mushtaba afraad se pooch tach ki thi. CBI ke ohdedaron ney qabal azeen jaanch ki Report ka tafseeli jaiza bhi liya tha.