London: Bartania ki Cambridge University ne elaan kiya hai ke coronavirus ke phelao ki wajah se un ke lectures aindah taleemi saal tak online hi diye jayen ge. University ne jo 800 barsoun se talba ka Class Rooms mein istaqbaal kar rahi thi, March mein Bartanwi hukoomat ki janib se coronavirus ke phelao ko rokne ke liye ek sakht lockdown muta-arif karane ke baad apne camps band kardiye.
Senior Prof Vice Chancellor Graham Virgo ney kaha ke 2021 ke mausam garma tak lectures ko online diya jaye ga. Unhoun ney kaha ke ye kisi online course ki terhan mehsoos nahi hoga. University ney kaha ke ye faisla coronavirus se nimatne ke baaray mein sarkari Guidelines par munhasir hai jis par jaiza liya ja sakta hai. Bartania ki Universities ki tarjuman ney bataya ke Cambridge ka elaan Bartania mein is terhan ka pehla elaan hai jis mein pooray saal ka kaha gaya hai.
Wazeh rahay ke California state university ne guzashta haftay infection ki doosri lehar ke khadshaat ke baais America mein pehli martaba mausam khizaa ki classes ko Virtual banane ka faisla kiya. Kuch chhootey Americi schools ne bhi isi terhan ke mansooboun ka elaan kiya hai jabkay mulk ki bohat si muaziz universities is baaray mein faisla nahi kar saki hain. President University ne kaha hai ke is par kaam kar rahay hain aur inhen lagta ke is mausam khizaa mein Classes online rahengi taham July ke awail tak is ka bazabta faisla nahi hosakta.
Doosri janib mazeed darjanoun Americi Universities ka kehna hai ke wo mausam khizaa mein apne Camps kholne ka iradah rakhtay hain aur rawan mah chand tehqeeqi Libraries ko juzwi tor par dobarah kholne ka iradah kar rahay hain. Bartania ke Universities ke wazeer ne rawan mah ke aaghaz mein kaha ke jab tak Universities Online dars o tadrees ke aala miyaar ko barqarar rakhtay hain tab tak mukammal Tuition Fees wusool kar saktay hain. –YTN STAFF