Bhopal : Madhya pradesh ke Rajgarh zila mein, BJP kaarkunoun aur intizamia ke mabain tassadum hua, jo itwaar ke roz shehriat tarmeemi act ki himayat mein Tiranga March kar rahay they. Raaj garh ke collector Nidhi nivideta ne dafaa 144 ke nifaz ki wajah se BJP kaarkunon ko muzahira karne se roka, lekin woh raazi nahi hue, is douran collector ne kaarkunoun se zabar dast behas ki aur ek BJP rehnuma ko thapar maar diya.
Is douran, tanaza badhta gaya aur police ke sath sath collector bhi BJP kaarkunon ko qaboo karne ke liye jaddo jehed karte hue dikhayi diye. Soorat-e-haal kharab honay par police ne laathi charge kiya, jis mein 2 karkun zakhmi hogaye. Raaj garh zilai head quarter mein shehriat tarmeemi act ( CAA ) ki himayat mein BJP ke programme ko dafaa 144 nafiz karne ki wajah se ijazat nahi di gayi thi. iske bawajood BJP ke karkun qanoon ki parwah kiye baghair jama hogaye.
Raaj garh ki collector nidhi nivideta aur police SP ne BJP kaarkunon ko roknay ki poori koshish ki, lekin bheedh ne unki baat nahi maani. aur rally nikaalne ki koshish ki. is douran police intizamia aur BJP qaideen ke mabain 2 baar haatha payi hui. iske baad halaat kasheeda honay par laathi charge kiya gaya, jis mein 2 afraad zakhmi hogaye.
Raaj garh mein haftay ke baad dafaa 144 nafiz kardi gayi hai. iske bawajood BJP ke karkun CAA aur NRC ki himayat mein muzahira karne par bazid they. ijazat na honay ke bawajood kaarkunon ki badi tadaad ke jama honay ki wajah se hungama aarai shuru ho gayi.
Hungama karne walay 8-10 BJP kaarkunon ko police tehweel mein liya gaya hai. aur kayi mafroor hain. collector ne sorat-e-haal ko par sukoon qarar dete hue qanoon ko haath mein leinay walon ke khilaaf sakht karwai karne ko kaha hai. hujhoom ko bhid kanay par BJP ke sabiq MLA ke khilaaf bhi karwai ki jarahi hai. –YTN STAFF