Lacknow: Lacknow mein All India Majlis-e-Ittehadul Muslimeen ( AIMIM ) ke zilai secretary Aziz-ur-Rehman ko shehriat tarmeemi act ( CAA ) aur shehrioun ke qaumi register ( NRC ) ke khilaaf ehtijaj mein honay walay tashadud ke baad mulk se baghaawat ke ilzaam mein giraftar kiya gaya hai.
Aziz-ur-Rehman jinhein’ Bazaar Khala’ ke ilaqay se giraftar kiya gaya, Wo peer ke roz darul-uloom Nadwatul Ulama ki janib se CAA aur NRC ke khilaaf kiye gay muzahiray ka hissa they. Isse qabal 13 decemeber ko honay walay ehtijaj mein bhi wo shaamil they. Ek senior police ohdedar ne kaha ”un par logoun ko tashadud par uksanay ka ilzaam aed kiya gaya hai, Jo ke baghaawat ke mutradif hai“.
Peer ke roz Darul Uloom Nadwatul Ulama mein muzahira is waqt par tashadud hogaya tha, Jab talba ne police par pathrao kiya. Ye talba itwaar ke roz Delhi ke Jamia Millia Islamia mein talba ke khilaaf police karwai ke khilaaf ehtijaj kar rahay they. Is douran police ko talba ko qaboo karne ke liye halki taaqat ka istemaal karna pada aur is ke baad Jamia ko 5 January tak band kar diya gaya.
Idhar peer ko honay walay tashadud ke ilzaam mein 19 afraad ko Mau mein giraftar kiya gaya hai aur video footage ke zareya deegar afraad ki shanakht ka amal jaree hai. UP ke DGP O.P Singh ne kaha ke riyasat ke tamam taleemi idaroun ki sorat-e-haal ab qaboo mein hai. Unhoun ne kaha ke police chokas hai aur logoun se appeal ki hai ke wo samaaj dushman anasir ke zareya phailai janay wali afwahoun par tavajja nah den. –YTN STAFF