Hyderabad. Gachibowli X Roads, Hyderabad mein aaj subah aik taiz raftaar Bus ney teen Rahroon ko kuchal dala. Yeh waqea peer ki subah 7:00 bajay paish aaya. Bus number 87 Lingampally se Koti jane wali Telangana State Road Transport Corporation ki bus ney jo raftaar ki had se taiz daud rahi thi daftar jane waloon ko roond dala. Bataya jata hai ke yeh teen log sadak uboor kar rahay thae ke aik taiz raftaar Bus ki zad mein aagaye. Woh Bus Stop ke paas thahre huwe thae aur phir sadak uboor karna hi chahtay thae ke taiz raftaar Bus aa pohanchi aur inhen kuchal dala. Haadse ke fauri baad Driver, Bus chod kar faraar hogaya. Inspector Raidurgam Police Station Mr. Ram Babu ney bataya ke tehqiqaat ki jarahi hain. Bus Driver ke khilaaf tazirat e Hind ki dafaa 304 (a) aur 279 ke tehat laaparwayi ke nateeja mein mout ka sabab ban’nay ka muqadma darj karliya gaya hai. Unhon ne bataya ke aayini shahideen se baat cheet karne par patachala ke Driver be-ehteyati se gaadi chala raha tha aur uss ki raftaar bhi bahut taiz thi. Ayini shahideen ke mutabiq gaadi bahut taiz thi aur junction ke paas bhi driver ne gaadi ki raftaar kam nahi ki thi. Teen mahalukeen ki shanakht Janardhan mutawatin Banglore, Dashrath saakin Nanakramguda aur Hamid ki hesiyat se ki gayi. Haadsa ke baad kuch der ke liye is masroof tareen sadak par Trafic jaam rahi. Mahaukeen ki laashon ko postmortem ke liye Omania General Hospital muntaqil kardiya gaya hai. Yeh pata chalanay ke liye haadese kis tarha paish aaya Aini shahideen ke bayanaat bhi qalamband kar rahi hai aur CCTV Footage bhi haasil kar rahi hai. June mein aisay hi aik haadese mein Shamirpet par Bus ki takkar se do bike sawaar halaak hogaye thae.