Hyderabad : Jab aman ke muhafiz hi mahol ko kharab karne ke Daur pay honto is se buri baat kiya hosakti hai. Riyasat Telangana ke dar-ul-hukoomat shehar-e-Hyderabad mein ek ajeeb wo munfarid waqiya paish aaya, jahan khud police ki janib se mubayyana tor par firqa waranah harkat phelanay wo hindu muslim bhai chaaray ko pamaal karkay ishtial angazi phelanay ki koshish ki gayi.
Tafseelaat ke mutabiq puranay shehar ke Tappa chabutra, Mustaed pura jaisay hassas ilaqoun mein saada libaas mein malbous police constables, motor cycles par sawaar hokar apni peshani par zafrani tilak laga kar aur moter cycle ki pichli nishist par burqa pehnay mard constable ko bitha kar gasht karwane lagey. is douran baaz muqami afraad ne is manzar ko dekh kar inhen rok liya, aur unki is harkat par aiteraaz kiya, to inhen hi tehweel mein le kar police station muntaqil kar diya gaya.
Aisa lag raha hai ke chedh chad ke naam par musalmanoun mein ishtial paeda karne ke liye khud qanoon ke Muhafiz hi aisi nichi harkat kar rahay hain. aur shehar ke aman wo Amaan ko kharab karne ki koshish kar rahay hain.
Aisi bhi it-tila-aat mili hain ke Tappa chabutra, mustaed poora ke alawa dosray muslim ilaaqoun mein bhi aisi hi muhim chalaye ja rahi hai, jiska maqsad sirf aur sirf kasheedgi paeda karna hai. police ki janib se is terhan ki harkat na qabil-e-qubool hai. mehakma police ke aala hukkaam ko chahiye ke is waqiya mein mulawis afraad ke khilaaf sakht karwai karen. –YTN STAFF