Lucknow- ” Ayushman Bharat ” scheme khat e iflaas se neechay zindagi busar karne walay khandano (Below Poverty) ke liye hai, iss se istifada karne walon ki fehrist mein Uttar Pardesh ke kaabini wazeer Satish Mahana aur un ke khandan ka naam bhi shaamil hai. Ittela milney par wazeer ney fehrist dekhney ke baad DM ko jaanch aur kaarwai ki hidayat di. Sab se badi sahat Bima Yojana ki shakal mein haal hi mein wazeer e azam Narendra Modi ney Ayushman Bharat Yujana shuru ki hai. Iss mein ghareeb gharanon ko Registered kar ke 5 lakh rupiye tak ke ilaaj ki sahoolat di jani hai. Ahliat ki mutadid sharayet hain. Un ke alawa 2011 ki BPL fehrist se bhi naam liye gaye hain magar mustahiqeen ke naamon ke intekhab mein abhi se jealsaazi shuru hogayi. Iss kaam se munsalik sarkari macinary apni marzi se logon ke naam shaamil kar rahi hai. Is ka khulasa khud wazeer Industrial Development Satish Mahana ney kiya. Darasal inhen ittela mili ke un ka aur un ke ahale khandan ka naam fehrist mein maujood hai. Iss par unhon ney DM Vijay Vishwas Pant ko phone aur khat tehreer kar ke wazeh kiya ke woh issss scheme ke mustahiq nahi, iss liye tarjeehi buniyad par unka naam hazaf karkay hajatmandon ke naam shaamil kiye jayen.