New delhi : Lok Sabha intikhabaat 2019 mein apni qismat aazmaane wali bollywood hastiyoun mein kisi ne nakami ka zayeqa chakkha to kisi ne kamyabi ka jaam nosh kiya aur agar bollywood andaaz mein hi kaha jaye to kahin khushi kahin gham ka samaa raha hai. Bollywood ki duniya se siyasat ki duniya mein qadam rakhnay walon mein Sunne deol pehli bar Bharatiya janata party ke umeed waar ke tour par Punjab ke gurdaspur lok sabha halqay se intikhabi maidan mein utre aur congress ke sunil Jakhad ko 77 hazaar se ziyada voton se shikast day kar pehli hi martaba mein kamyabi haasil karli .
Doosri janib pehli martaba siyasi maidan mein utarney wali Urmila Matondkar ne congress ke ticket par Mumbai shumali lok sabha Nishisit se election lada lekin qismat ne unka sath nahi diya aur inhen BJP umeed waar Gopal shetty ke khilaaf taqreeban 4 laakh 65 hazaar se ziyada voton se shikast mili. mashhoor adakar aur siyasat daan Shatrugan sinha waisay to do martaba rukan-e-parliment aur sabiq markazi wazirah chuke hain lekin BJP se unki baghaawat ke paish-e-nazar is martaba inhen unki riwayati Nishisit patna sahib se ticket nahi mila aur unhon ne isi Nishisit se congress ki taraf se election lada lekin unke siyasi hareef aur BJP ki janib se patnah sahib se umeed waar Ravi Shankar prasad ne inhen 2 laakh se ziyada voton se shikast di .
Sinha ki ahliya punam sinha bhi pehli martaba intikhabi maidan mein utarney walon mein shaamil rahen aur unhon ne samajwadi party se Lucknow nishist se lok sabha election lada. yahan bhi BJP ke qad aawar leader aur markazi wazeer Rajnath singh ne sinha ko teen laakh 85 hazaar 302 voton se shikast di. TV adakara aur siyasat daan Smriti irani ne is martaba zabardast karkardagi ka muzahira kiya. unhon ne congress ke sadar Rahul gandhi ke khilaaf ki party ke gadh amethi se phir election lada lekin is martaba baazi Smiriti irani ne marli . congress se 3 baar rukan-e-parliment rahay Uttar pardesh ke sadar Raj babbar is martaba fatehpur sikri se election lad rahay thay inhen BJP ke Raj kumar Chahar ne taqreeban 4 laakh 94 hazaar voton se shikast di .
Hema Malini mashoor adakarah ki qismat ne is martaba bhi unka sath diya aur Mathura Nishisit se RLD ke kunwar Narendar singh ko 2 laakh 93 hazaar 471 voton se shikast day kar unhon ne apni shandaar jeet darj ki. is jeet haar ke khail mein mashoor adakarah Jaya prada is martaba peechay reh gayeen. samaaj waadi party mein rehtay hue 2 martaba rukan-e-parliment bani Jaya prada is martaba BJP ki janib se Rampur se umeed waar banai gayeen theen lekin samajwadi party ke leader Mohammad Azam Khan ke samnay woh tik nahi payen aur inhen shikast ka mun dekhna pada. moujooda rukan-e-parliment kiran kheer ne Chandigarh Nishisit se congress ke pawan kumar bansal ko 46 hazaar 970 voton se shikast day kar yahan apni futohat ka silsila barqarar rakha . –YTN STAFF