Prayagraj: Uttar Pradesh ke zila Prayagraj mein maamar afraad aur mauzureen ke darmain alaat taqseem karne ke baad Wazeer e Azam Narendra Modi ne kaha ke hamari hukoomat bulaa tafreeq samaaj ke har tabqay ke falah ke liye kaam kar rahi hai. 130 Crore Hindostanioun ke mafaad ka tahaffuz karna un ki hukoomat ki awleen tarjeeh hai. Uttar Pradesh ke 2 azlaa ke doray par pehlay Prayagraj puhanche wazeer e azam ne Narendra Modi ne 10 mazorin ko apne hathon se alaat daine ke baad un se khitaab karte huve kaha ke aap ke Pradhan sewak ke tor par mujhe hazaroun mazorin aur buzurgoun ki khidmat karne ka mauqa mila hai. Aaj is khusoosi taqreeb mein taqreeban 27 hazaar afraad ko alaat diye gaye.
Is se qabal Wazeer e Azam Narendra Modi Uttar Pradesh ke 2 azlaa ke doray par khusoosi tayyaray se 10:30 bajey Bamrauli Airport puhanche. Jahan Governor Anandiben Patel aur Chief Minister Yogi Adityanath ne un ka istaqbaal kiya. Airport se Wazeer e Azam ba zarea Helicopter Prayed Maidan puhanche. Prayagraj ke baad wo Chitrakoot ke liye rawana hogaye jahan par wo Bundelkhand Expressway ki sang bunyaad rakhi.
Wazeer e Azam ne apne khitaab mein mazorin ko hosla dete huve kaha ke ye alaat aap ke zindagi ki mushkilo mein kuch madad karen ge. Ye mehez muawin alaat hain. Aap ki himmat, Hosla hi kaafi ahem hai. Aap ki zindagi ko agar koyi bareeqi se dekhe to har kisi ke liye is mein raghbat ki wajah chhupi huvi hai. Wazeer e Azam ne kaha ke hamari hukoomat ne mazorin ke liye jis jazbay ke sath kaam kiya hai aur faislay kiye hain is ki jitni tashheer honi chahiye thi wo nahi ki gayi. Hamari hi hukoomat hi hai jis ne pehli martaba mazorin ke haqooq ke liye qanoon nafiz kiya. Mazorin ke zumra bandi ko saat se badha kar 21 kardiya gaya. Mazorin par zulm o sitam aur mazaq ke shaqoun ko mazeed sakht kiya gaya. –YTN STAFF