Haliya munaqidah Dubbaka halqa ke zimni intikhab mein kamyabi ke baad buland housloun ki Telangana BJP, Greater Hyderabad municipal corporation ( GHMC ) ke intikhabaat mein kamyabi ke liye Pur-azm hai jiska aalamia aaj reyasti election commission ne jari kiya hai. BJP 1st December ko honay walay un intikhabaat mein kamyabi ke silsila ko jari rakhna chahti hai.
Dubbaka ke intikhabaat mein Telangana ki hukmaran jamaat TRS ko shikast bardasht karni padi thi. Siyasi mubasireen ne TRS ki is shikast ki wajohaat ko had se ziyada khud etemadi, kamzor umeed waar aur cheif minister ki janib se intikhabi muhim na chalanay ko qaraar diya hai.
BJP ke rehnuma Raghunandan rao ko umeed hai ke Greater Hyderabad mein BJP ko kamyabi mileygi.
Telangana BJP ke senior leader ne daawa kiya ke party ki kamyabi ko koi bhi ab rok nahi sakta. unhon ne kaha ke Dubbaka assembly ke zimni intikhab ki tarhan hyderabadi awam hukmuran jamaat TRS ko bada dhakka dainay ke liye tayyar hain. unhon ne khayaal zahir kiya keh taleem Yafta log aur khangi mulazmeen TRS se naraaz aur barham hain. Unhoun ne Greater Hyderabad municipal corporation ( GHMC ) ke intikhabaat ke elaan ke paish-e-nazar media se baat karte hue is azm ka izhaar kiya ke Greater Hyderabad mein BJP ki kamyabi yakheeni hai.
Unhon ne ilzaam lagaya ke guzishta intikhabaat mein hukmaran jamaat ne ghareebon ko double bedroom makanaat fraham karne ka wada karte hue vote haasil kiye thay taham is wada ko faramosh kardiya gaya.