New Delhi: Delhi fasadaat se mutaliq Congress ki ek team ne aaj tafseeli Report Party sadar Sonia Gandhi ke samnay pesh kardi. 28 Feb ko Sonia Gandhi ne Congress ke Senior Leaders Mukul Wasnik, Shaktisinh Gohil, Tariq Anwar, Kumari Selja aur Sushmita Dev ku ye zimma daari di thi ke wo tashadud se mutasirah ilaaqoun ka dora karen aur mutasireen se baat cheet kar ke ye maloom karne ki koshish karen ke aakhir Delhi mein mahol kharab karne ke peechay kin anaser ka haath tha. Report mein is Team ne pur-tashaddud waqeat ke liye BJP ke sarkardah Leaders ke ishtial angaiz bayanaat ko sab se ziyada zimma daar thehraya aur kaha ke markazki Modi hukoomat aur riyasat ki Kejriwal hukoomat dono hi is baat ke liye zimma daari hain ke unhoun ne tashadud ko roknay ki koshish nahi ki.
Congress ne is talluq se aaj ek Press Conference ki jis mein Shaktisinh Gohil ne wazeh alfaaz mein kaha ke BJP jahan jahan tashadod karawati hai, Is ka tareeqakar yaksaa hota hai. Hum ne Delhi mein bhi aisa hi dekha. Baher se kuch loog afwaah phelanay ke liye atay hain. Is ke baad uksanay ke liye koi bahar say leader aata hai. Jab fasaad hota hai to is waqt wo gayab hojata hai. Shuru mein Police ko kaha jata hai No Action aur phir halaat beggad jatay hain. Unhoun ne mazeed kaha ke mein is dawakhana mein gaya jahan zakhmi Police wala zair e ilaaj tha. Mein Police walay ke afraad khandan se bhi mila. Unhoun ne kaha ke pehlay din hum logoun ko haath paon mein bediyan bandh kar bheja gaya tha. Yani kaha gaya tha ke No lathi, No Action, No Goli, Nothing ( kuch nahi ). Goya ke pehlay din fasaad bhadkey is ke liye poori chhuut di jaye. Ye tareeqakar wahi hai jo BJP hamesha karwati rahi hai. Is ke baad 50 mein se is khaas ( tabqa ke ) dukanat ki shanakht kar ke jala diya jata hai.
Shaktisinh Gohil ne Press Conference mein kaha ke tashadud walay ilaqa ka dora karne ke baad hamein ye saaf pata chala ke Delhi walay ladna nahi chahtay thay, BJP ki Vote Bank ki saazish ne unhein aapas mein ladhwaya hai. Shehriat Tarmeemi Qanoon ke khilaaf muzahira karne waloun ke baray mein shehriat tarmeemi qanoon ke haami logoun ne bhi yahi bataya ke wo pur aman muzahira kar rahay thay aur agar unhein uksaya nahi jata to fasaad nahi hota. Shaktisinh ne kaha ke yahan Hindu. Muslim sabhi aapas mein pyar mohabbat se reh rahay thay. BJP aur AAP, Dono ne Vote Bank siyasat kar ke awam ko nuqsaan pohanchaya. Modi aur Amit Shah jaisay leaders ne bhi aisa bayan diya jo nafrat badhaane ka kaam karta raha. Phir ek sonchi samjhi saazish dekhnay ko mili.
Unhoun ne mazeed kaha ke tashadud walay ilaqa mein hum gaye to logoun ne kaha ke teen chaar logoun ne kaha ke ek Group aa raha hai, Aap ikathay hojaye warna aap ke ghar mein gusse ge. Sab ikathay hogaye. Babarpur mein Dargah Vahini ki leader ne pathar baazi karwai. 2 Muslim bhai aur 1 Hindu bhai ki jaan chali gayi. Isi terhan ka waqea doosri jaghoun par bhi huva. Ye sab ek saazish ka nateeja maloom hota hai. Delhi ke logoun ke darmain ye zeher gholnay ka kaam BJP aur un ke hamioun ne karwaya hai, Aur sath hi Aam Aadmi Party bhi zimma daar hai, Unhoun ne bhi tashadud ke waqeat ko nazar andaz kiya. Agar sahi maino mein kisi bhi ek hukoomat ( markazi ya reyasti ) ki janib se tashadud roknay ki koshish hoti to halaat kharab nahi hotay. –YTN STAFF