Lacknow: Naye saal 2020 ke Salaam kehnay ke sath hukmaran Bhartia Janta Party ( BJP ) par tanz karte hue Bahujan Samaj Party ( BSP ) ki sarbarah Mayawati ne kaha ke firqa waranah aur taasub se bhadi soch wali markaz aur reyasti hukoomat ki tareeqakar se pichla saal tashadud se maamoor raha, Kuch partiyoun mein baithy zimma daar logoun ko ye qattehi nahi bhoolna chahiye ke apna Hindustan ek secular mulk hai.
Mayawati ne kaha ke BJP ki markaz aur reyasti hukoomatoun ki firqa waranah aur tang soch ki wajah se guzra saal ziyada tar taqseem aur ayeen ko kamzor karne wala raha jo mulk ke liye bad qismati aur intahi tashweesh ki bhi baat hai.
Unhoun ne kaha ke siyasi mafaad mein kuch jamaatoun mein baithy zimma daar logoun ko ye qattehi nahi bhoolna chahiye ke apna Hindustan ek secular mulk bhi hai. yahan mukhtalif mazahab ko maan-ne walay loog rehtay hain. Un ki apni tarz zindagi ki apni apni saqafat aur toor tareeqay hain. Aisay mein hamein un kisi bhi soorat mein dakhal nahi dena chahiye balkay tamam mazahab ki saqafat aur tahazeeb ka poora poora ehtram karna chahiye.
Shehriat tarmeemi qanoon ( CAA ) ke khilaaf Uttar Pradesh samait kuch reyastoun mein bharkey tashadud ki muzammat karte hue BSP sarbarah ne kaha ke kisi bhi soorat mein mukhalifat karne ka tareeqa bhi aisa hona chahiye jis se yahan kisi bhi mazhab ko maan-ne walay logoun ke mazhabi jazbaat ko koi thaiss nah puhanche aur mulk mein aman o chain aur sukoon ka mahol barqarar rahay.
Mayawati ne is mauqa par Mahatma Jyotiba Phule, Bhimrao Ramji Ambedkar, Chhatrapati Shahuji Maharaj , Narayana Guru aur Kanshi Ram ko yaad kya aur bi SP ke hamioun aur awam ko naye saal ki mubarak baad di. –YTN STAFF