Hyderabad: Gosha Mehal ke BJP MLA T Raja Singh ne yeh ilzaam ayed karne ke baad tanaza khada kiya ke 6 martaba ki Grand Slam faateh Sania Mirza is waqt mojood thi jab Waqarabad mein Damagundam Reserve Forest mein 5 din qabal ek bichhre ko goli maar kar halaak kiya gaya tha. Muqami logon ko yeh khabar pesh karte hue MLA Raja Singh ne ilzaam lagaya ke Sania Mirza is jagah ke qareeb mojood ek Form House ka maalik hain jahan bitchdha murda paaya gaya tha. Unhoun ne Telangana ke Chief Minister K Chandrashikhar Rao se mutalba kiya ke un logon ke khilaaf qatal ka muqadma darj kiya jaye jinhon ne muqaddas gaaye ko halaak kiya aur waqeye mein Sania Mirza ke kirdaar ki tehqiqaat karwaen.
Yahan is baat ka tazkara bhi ahmiyat ka haamil hai ke 23 October ko Waqarabad ke ek gaon Dumma Gudem ke qareeb ek bhens ke sath golion ke zakhamo se ek murda bitchdha mila tha. Police ne ek form house ke chokidaar par shak kiya aur usay giraftar karliya. Raja Singh ne kaha hai ke media ne ittila di ke Sania Mirza ke Form house mein Omar naam ke ek Security Guard ne bitchdha ko goli maar di lekin dehati yeh keh rahay hain ke waqea ke waqt Sania Mirza mojood thi aur is ne khud aatsheen asleha khech liya.
MLA Raja Singh ne yeh bhi ilzaam lagaya ke jungli janwaron ka shikaar karna Sania Mirza ke rishta daaron ka baqaida mashgala hai. Dehation ne kaha hai ke Sania Mirza aksar Dubai aur Saudi Arab se apne rishta daaron ke sath form house aati hain aur woh jungle mein shikaar karne jatay thay. Form house ke andar morron ke maaray jane ki bhi aisi misalein mojood hain jo kabhi manzar aam par nahi ayen.