New Delhi : Jab se Motor Vehicle Act ka naya qanoon nafiz hua hai tab se challan ki ruqumat mauzo behas bani hui hai. ab khabar aayi hai ke sab se mehanga challan Delhi mein kaata gaya hai aur jurmana ki raqam hazaaro may nahi balkay laakh mein hai aur yeh challan 1.41 laakh rupay ka hai. is challan ke jurmana ki raqam to sab se ziyada hai hi sath mein jis shakhs ka challan kaata hai iska naam bhi bohat ahem hai. kyunkay iska nam bhagwan Ram hai, woh Rajasthan ka rehne wala hai aur ek transporter hai. Bhagwan Ram Nami shakhs ka challan over loading ke jurm mein kaata gaya hai.
Bhagwan Ram Nami shakhs ne 1.41 laakh rupay ka jurmana rohini court mein ada bhi kardiya hai. is challan ke bharnay ke sath hi woh mulk ke pehlay aisay transporter ho gay hain jinhon ne sab se mehanga challan bhara hai. is se qabal sab se mehanga challan 86 hazaar rupay ka bhara gaya tha aur yeh challan Delhi ke ek truck ka over loading ke jurm mein Haryana mein kiya gaya tha.
Wazeh rahay jaisay jaisay naye aur bhaari jurmana ki khabar aam hoti ja rahi hai waisay waisay achi sadkon ka mutalba bhi badhta ja raha hai. log yeh bhi mutalba kar rahay hain ke jin sadkon par street lights theek nahi hain wahan un ko fouran theek karwaya jaye.
Awam ka kehna hai ke agar sadkain achi hon to inhen jurmana ki badhi raqam ada karne mein aiteraaz nahi hai is liye hukoomat ne jahan jurmana ki raqam badhai hai wahein woh is ko bhi yakheeni banaye ke sadkain bhi achi hon.
Wazeh rahay naye Motor Vehicle Act ke nafiz honay ke baad jurmana ki raqam mein kayi gina izafah ho gaya hai. over loading mein do hazaar jurmana ko badhha kar 20 hazaar rupay kar diya gaya hai aur baghair driving license ke gaadi chalanay par jurmana ki raqam 5000 rupay kar di gayi hai. –YTN STAFF