Patna: Bihar Begusarai parlimani halqa mein is martaba lok sabha intikhabaat ke douran do sakht mukhalifin, dayen bazu ke Bharatiya Janata Party ( BJP ) ke Giriraj Singh aur Communist ki kamzor party ko dobarah mazboot karne ki umeed ban kar ubhray hindustani communitst party ( CPI ) ke Kanhaiya kumar ke darmiyan dilchasp muqaabla ke alawa Mahagathbandhan umeed waar Tanveer Hussain ki aamad ki wajah se ho rahay seh rukhi muqablay par pooray mulk ki nigehain markooz hain.
Qaumi shayar Ram Dhaar singh dankar ki jaye paidaiesh Begusarai mein lok sabha intikhabaat mein Giriraj Singh singh aur Kanhaiya kumar mein barah e raast muqaabla maana jaraha tha, lekin paanch partiyoun ke Mahagathbandhan ki janib se RJD ke Tanveer Hussain ko umeed waar banaye janey se yahan muqaabla seh rukhi aur dilchasp ho gaya hai. Mahagathbandhan ne apna umeed waar utarkar Begusarai mein BJP mukhalif vote haasil karne ke Kanhaiya ki hikmat e amli ko ek tarha se dhaka lagaya hai ab BJP mukhalif vote RJD aur CPI ke darmiyan taqseem hosakte hain .
Is nishist par BJP, CPI aur RJD teeno apne umeed waar ki jeet yaqeeni bananay ke liye aidi choti ka zor laga rahay hain. Giriraj Singh ke haq mein BJP ke star parchark jam kar road show aur rallies kar chukay hain. BJP sadar Amit Shah ne haal mein intikhabi rally ki, wahein Bihar ke naib chief minister Sushil Kumar Modi aur BJP ke deegar senior leader bhi koi kasar nahi choadi hai. doosri janib Kanhaiya ke tashheer ke liye taalib-e-Ilm ke douran siyasat ke aazamaae gaye chhootay chhootay zaraye ka istemaal kar rahay hain. Kanhaiya din ko Rallies to raat ko nakhreh natak ke zariye vote maang rahay hain. un nakhreh dramon mein achi khasi bheedh jama hui hai. muhim ke douran Kanhaiya ghar ghar ja kar jahan buzurgon se aashirwad letay rahay wahein noujawanon ke darmiyan unke saathi ban jatay hain. Begusarai ilaqay ke buzurgon ko Kanhaiya mein mulk ki siyasat ka chamakta sitara dikhayi day raha hai to nojawanon ko ek aisa saathi jo tamam bandishen todh kar inhen sath le kar chalne ki zid mein hai .
Kanhaiya ka karvan JNU, Dehli university aur Jamea Millia Islamia ke sathiyon ke sath dafli ki thaap par tharakta bhi hai aur zamindaroun aur sarmaya daarana nizaam se azaadi ke liye lalkarta bhi hai. woh aadhi abadi ke liye bhi, khawateen mangay azaadi woh bhi aadhi. aadhi, jaisay naaray bhi lagataa hai. Kanhaiya ke intikhabi muhim ko bollywood ka bhi sath mil raha hai. naghma nigaar Javed Akhtar ke alawa adakara Shabana aazmi aur suriya Bhaskar aur adakar Prakash Raj Kanhaiya ke haq mein tasheer kar chuke hain. itna hi nahi siyasat mein nai lakeer khech rahay Kanhaiya ek aisay icon ban gaye hain ke unko tarjeeh dainay se media bhi khud ko nahi rokkk pa raha hai. qaumi TV channels aur print media ke senior aur naamwar sahafi Begusarai ka chakkar lagarhe hain. wahein RJD umeed waar Tanveer Hussain ke haq mein Mahagathbandhan ke Star campaigner aur Bihar assembly mein oppostion ke leader Tejasvi Yadav ke alawa deegar rehnuma bhi zor laga rahay hain .
Is ilaqay mein kabhi kabhi sakht mukhalif nazriaat ka tassadum bhi dikhayi day raha hai. mukhalif nazriya ke log Kanhaiya ko siyah parcham bhi dikha rahay hain. Ek road show ke douran Koraye gaon mein Kanhaiya ko na sirf siyah parcham dikhaay gaye balkay unke khilaaf naaray baazi bhi ki gayi. iske baad dono fareeqon mein tassadum aur maar peet bhi hui. maamla thaanay bhi pouncha aur FIR bhi darj hui .- YTN STAFF