Hyderabad: Cyber crime hukkam ne khabardar kiya hai ke smart phones par logon ke badhte huwe inhesar ki wajeh Cyber jarayem bhi badh rahe hai. Taza tareen dhoka dahi ki mamlaat ko dekhte huwe Cyber crime hukkam ne khabardar kiya hai dhoka baaz kisi maqsoos tareeqe kaar se chimte nahi rehte aur aaye din unke dhoke dene ke andaz badalte rehte hain aur ab woh muammar shehriyon aur sabakdosh mulazimeen ki ek badi tetaad ko muqtalif tareeqon se apna nishana bana rahe hain jo barqi connection ke mutalliq paigam rawana karte huwe bank se raqm ghayeb kardi jaarahi hain.
Auhdedaro ke mutabiq dhoka bazon ka tazaa tareen tareeqe kaar yeh hai ke woh apne mumkina shikar ko uske barqi connection se mutalliq ek text message rawana kar rahe hai. Aur unhe khabardar kar rahe hai ke wajibaat ki adam adaigi par barqi connection munqata kar diya jayeiga. Phone par jo text message mil raha hai woh kuch is tarha tehreer hain. Pyare sarifeen aap ke liye ehum ittela aaj raat 10.30 aap ke ghar ka bijli connection kaat diya jayeiga. Pichle maah bill ko update nahi hain aur is ki tafseelat na rakhne ki wajeh se yeh iqdaam kiya ja raha hai barqi connection barqarar rakhne ke liye barahe meharbani fauri taur par hamare electricity ke power officer ke customer support number 919066868000+ par rabt qayem karein shukriya.
Yeh woh paigam hai jo kayi afraad ko mausool huwa hai. Ek Auhdedar ne kaha hai khabardar karne wala yeh paigam jali huroof ke saath aur achanak khas waqt ke zikr ke saath mausool ho raha hai jis se muammar afraad ki pareshani satwe aasman par pohunch rahi hai jis par fauri harkat mein aate huwe mazkoora number par jab raabta kiya ja raha hai toh bank account se raqm hadapli ja rahi hai.
Is tarha ki tehreere bunyadi taur par muammar sarifeen ko bheji jaati hain aur ek baar jab saarif farahum karda number par rabt karta hain toh dhoka dahi karne wala saarif ko danista taur par mashwara deta hain ke woh saarif ke smart phone par screen sharing app install karein jiske baad dhoke baaz mutasira shaqs ke ilm ke bagair uske phone tak rasai hasil kar leta hai…uske baad dhoke baaz mutasira shaqs ke bank account se tamaam dastiyab ruqoom ko apne accounts mein muntaqil karta hain