Hyderabad. Alhaidah riyasat Telangana ki tashkeel ke baad pehli martaba tashkeel panay wali Bar Council of Telangana State mein kam az kam do Muslim arkaan shaamil honay ke imkanaat hain. Council ke intikhabaat mein 9 muslim umeedwaar maidan mein they, taham sirf do umeedwaar Mrs. Z. H. Javed aur M. A. K. Mukeet ki kamyabi ke imkanaat roshan hain. council ke liye 29th June ko raye dahi hui thi jis mein 86 umeed waar maidan mein they. Aur 23rd July se raye shumari ka aaghaz huwa. Paheli tarjeeh ke votes ke natayej ki rou se Mr. Z. H. Javed ney 548 vote haasil karte hue choutha maqam haasil kya jabkay Mr. M. A. K. Mukeet ko 370 vote haasil huve aur inhen 16th muqam haasil huwa hai. Dosray tarjeehi votes ko shumaar karne ke baad umeedwaron ke maqam mein tabdeeli runuma hosakti hai. Qatayi natayej ka elaan 31st July ko kardiya jaye ga. Mr. Z. H. Javed mutahidda Andhra Pradesh ki aakhri Bar council mein woh waahed Muslim rukn ki haisiyat se shaamil they.