Dubai : World cup 2019 mein Pakistan ke Semi final mein pouhanchaney ke imkanaat madoom ho chukay hain, lekin Pakistani shaiqeen ko ab bhi umeed hai ke unki team Semi final tak rasai haasil kar sakti hai. Pakistan event ke Semi final mein kis tarhan pohanch sakta hai is par aam logon ki janib se qiyaas aariyan shuru kar di gayi hain taham ICC ki janib se is ke adaad wo shumaar samnay aagaye hain.
Semi final mein jagah bananay ke liye Bangladesh ke khilaaf Pakistani team ko sirf jeet hi nahi balkay bohat badey farq se jeet darkaar hogi. Pakistani team ke captain Sarfraz Ahmed agar toss jeet kar pehlay batting karne ka faisla karte hain to yeh team ke liye khush aaind ho sakta hai lekin Sarfraz ki team agar pehlay batting mein 350 score karti hai aur Bangladesh ki team ko 311 runs se shikast deti hai to tab team Semi final mein rasai haasil kere gi. is score ke sath team ki kamyabi ka farq bohat hi kam hai, taham 400 runs bana kar 316 se shikat day kar bhi team Semi final mein pohanch sakti hai.
Isi tarhan agar Pakistan pehlay batting karte hue 450 runs ka hindsa ubor karti hai to usay 321 runs se match jeetna hoga. iske alawa agar Pakistani team na qabil yaqeen 500 runs bananay mein kamyaab hojati hai to usay yeh match 326 runs se jeetna hoga. doosri janib agar yeh toss Bangladesh ki team jeet gayi aur is ne pehlay batting karne ka faisla karliya to Pakistani team isi waqt event se bahar hojayegi kyunkay nishana ke taqub mein Pakistani team ka run rate behtar nahi ho sakta.
Pakistani team ke shaiqeen ab yahi umeed lagaye hue hain ke Bangladesh ke khilaaf honay walay match mein Pakistan pehlay batting karen aur sath record saaz aur ghair mamooli karkardagi ka muzahira karen. yahan ghour talab baat yeh hai ke Odi cricket mein ab tak sirf aik hi martaba 450 runs ka hindsa uboor ho saka hai jo ab tak ODI cricket ka sab se bada score bhi hai, jabkay 500 ka hindsa kabhi uboor nahi ho saka hai .
Australia ke khilaaf June 2018 mein english team ne one day ka sab se bada score 481 runs banaya tha. khayaal rahay ke ODI cricket mein Pakistani team aaj tak 400 runs bananay mein kamyaab nahi hui, iska sab se bada score 399 runs hai jo is ne Zimbabwe ke khilaaf banaya tha, is match mein Fakhar Zaman double century score karne walay pehlay Pakistani khiladi banay the.
-YTN STAFF