Hyderabad : Sabiq markazi wazeer mumlikat Bandaru Dattatreya 5 September ko Himachal pradesh ke governor ki hesiyat se halaf lenge.
Senior BJP rehnuma ney peer ke roz media numaindon ko bataya ke’ woh 4 September ko Himachal pradesh ke liye rawana honge, aur aglay din 5 September ko governor ki haesiyat se halaf lenge.
Dattatreya khairtabad ke mashhoor ganesh ke mujasmay par pooja karne ke baad yeh baat kahi. khairtabad ka ganesh ka mujasma Telangana aur Andhra Pradesh, dono reyaston mein sab se bada mujasma hai jis ki oonchai 61 foot hai.
Itwaar ke roz markaz ke zareya paanch reyaston ke liye muqarrar kardah naye governors mein se ek Dattatreya ney wazeer-e-aazam Narendra Modi aur wazeer-e-dakhla Amit Shah ka, unpar etemaad karne aur inhen governor muqarrar karne par shukriya ada kiya.
Dattatreya halqa parliament secunderabad se 4 martaba rukan-e-parliment muntakhib hue they. unhon ney atal bihari vajpayee hukoomat aur Sabiqa modi hukoomat mein wazeer ki haesiyat se khidmaat anjaam den. Dattatreya , jinhein 2017 mein wizarat se Bar-taraf kiya gaya, haliya intikhabaat mein bhi inhen ticket dainay se inkaar kiya gaya tha. –YTN STAFF