New Delhi: Badminton Champion Saina Nehwal ne hukumrana jamaat Bhartia Janta Party mein shamoliat ikhtiyar karli. Saina Nehwal apni behan Chandranshu Nehwal ke sath charshumbe ke roz BJP ke qaumi General Secretary Arun Singh ki mojoodgi mein party mein shaamil hogayin. Is mauqa par un ko guldasta pesh kiya gaya aur party ka khandwa pehnaya gaya.
BJP mein shamoliat ikhtiyar karne ke baad Saina ne kaha ”Aaj mein ne aisi party mein shamoliat ikhtiyar ki hai, Jo mulk ke liye bohat kuch karti hai. Narendra Modi din raat mulk ke liye itni mehnat karte hain. Mere liye abhi sab kuch naya hai, Lekin mujhe sab kuch pasand hai.
Saina ne kaha ”Narendra Modi jee ne kheloun ko faragh deya ”India Khelo“ ke tehat hosla afzai ke liye kaam karna shuru kiya hai“. Saina ne kaha mai bohat mehnati hon, Aur sakht mehnat karne waloun ko pasand karti hon. Mein Modi jee ke sath mulk ke liye kuch karna chahti hon. Mujhe siyasat pasand hai. Nojawanoun ko khelo India ke zareya khailnay ka mauqa mila. Mein Modi jee se bohat mutasir hon“.
Haryana mein peda honay wali 29 sala Saina Nehwal Hindustan ki mashhoor Badminton khiladi hain, Aur wo Hyderabad mein rehti hain. Jin ki Fan Following ziyada hai. Saina, Jo Badminton mein aalmi number ek then, Ko Rajiv Gandhi khail Ratan Award se nawaza gaya hai.
Saina ab tak majmoi tor par 24 bain ul aqwami Title jeet chuki hain. Isi douran, Unhoun ne London Olympics mein Kansa ka tamgha jeeta tha. Wo saal 2009 mein duniya ki doosri aur saal 2015 mein duniya ki number ek khiladi ban gayen. –YTN STAFF